त्रिवेणी: कावासोतीका दीप काफ्लेले आइतबार बर्दघाटबाट दाउन्ने पार गरी दुम्किबास निस्किन झण्डै १२ घण्टा लागेको बताए। आइतबार दिनभरको निरन्तर झरी र सडक मर्मतका कारण उनीजस्ता कैयौँ यात्रुहरूले यस्तै समस्या भोगेका छन्।
केही दिनअघिको झरीका कारण बाटो हिलो र चिप्लो हुँदा दाउन्नेको यात्रा निकै कष्टकर बनेको यात्रुहरूको गुनासो छ। पूर्व–पश्चिम राजमार्गअन्तर्गत नवलपरासीको दाउन्ने खण्डको यात्रा सकसपूर्ण हुन थालेको लामो समय भइसक्यो।
नारायणगढ–बुटवल सडक विस्तारको काम सुरु भएदेखि दाउन्नेबाहेकका अधिकांश क्षेत्रमा काम सकिए पनि दाउन्ने खण्ड नसकिँदा यात्रा अझै कष्टकर बनेको हो।
नवलपरासी (बर्दघाट सुस्ता पूर्व) र नवलपरासी (बर्दघाट सुस्ता पश्चिम) दुई जिल्लाको सीमामा पर्ने दाउन्नेमा करिब १४ किलोमिटर खण्डमा समस्या देखिन्छ। पश्चिम खण्डमा ठूलो समस्या नभए पनि पूर्वी खण्डमा जीर्ण सडकका कारण यात्रा कठिन हुने गरेको काफ्लेले बताए।
पानी परेको समयमा मात्रै नभई अन्य समयमा समेत दाउन्ने खण्डमा कल्भर्ट निर्माण, ढलानलगायतका काम हुँदा बाटो एकतर्फी सञ्चालन गर्नुपरेको छ। त्यसैले दाउन्ने पार गर्न घण्टौँ लाग्ने गरेको यात्रुहरूको भनाइ छ।
सडक विस्तार दाउन्ने खण्डमा सुस्त हुँदा यो क्षेत्रमा यात्रा गर्न समस्या भइरहेकाले यात्रुहरू असन्तुष्ट छन्। सडक निर्माणका क्रममा कतिपय ठाउँमा सडक एकतर्फी रूपमा सञ्चालनमा छ।
मुख्यगरी विश्वकर्मा मन्दिर, घ्यूखोला र त्रिसठ्ठी मोड क्षेत्रमा समस्या बढी देखिन्छ। एकतर्फ जीर्ण सडक र अर्कोतर्फ बेलाबेलामा बिग्रिने सवारी साधनका कारण सडक पूर्ण अवरुद्धजस्तै हुने गरेको यात्रुहरूको गुनासो छ।
पानी पर्दा दाउन्नेको सडक प्रायः चिप्लो हुने र यातायात सञ्चालनमा समस्या आउने गरेको छ। अन्य समयमा पनि यात्रा उस्तै कष्टकर रहन्छ। केही दिनअघिको झरीले यातायात सञ्चालन सहज हुन नसक्दा अहिले दाउन्ने क्षेत्रमा सवारीको ठूलो जाम लागेको छ।
जिल्ला प्रहरी कार्यालय नवलपरासी पूर्व, नवलपुरले सोमबार सूचना जारी गर्दै यात्रुहरूलाई वैकल्पिक मार्ग प्रयोग गर्न अनुरोध गरेको छ।
जिल्ला प्रहरी कार्यालय नवलपुरका प्रहरी प्रमुख प्रहरी उपरीक्षक युवराज खड्काका अनुसार दाउन्नेमा अहिले पनि बाटो चिप्लो हुँदा सवारी सहज रूपमा वारपार हुन सकेका छैनन्। कतिपय स्थानमा सवारी बिग्रिएकाले सडक एकतर्फी रूपमा सञ्चालन भए पनि अवस्था सहज नभएको उनले बताए।
‘केही दिनदेखिको सवारीको चाप छ। बाटो चिप्लो हुँदा उकालोमा सवारी उक्लिन सकेका छैनन्। ठाउँ–ठाउँमा बिग्रिएका सवारीले बाटो छेकेका छन्। हामीले सहज बनाउन प्रयास गरिरहेका छौँ। सकभर अहिले यो बाटो भएर यात्रा गर्नेहरूले वैकल्पिक बाटो प्रयोग गरिदिनुहोला,’ प्रहरी उपरीक्षक खड्काले भने।
