ग्लोबल आइएमई बैंकको नाफा २ अर्ब ३१ करोड नाघ्यो

काठमाडौँः ग्लोबल आइएमई बैंक लिमिटेडले चालु आर्थिक वर्ष २०८३/८४ को पहिलो त्रैमासमा आफ्नो अपरिष्कृत वित्तीय विवरण सार्वजनिक गरेको छ।

बैंकले सार्वजनिक गरेको वित्तीय विवरणअनुसार समीक्षा अवधिमा बैंकको खुद नाफा पनि २४.५० प्रतिशतले बढेर २ अर्ब ३१ करोड ३८ लाख रुपैयाँ पुगेको छ। यो गत आर्थिक वर्षको सोहि अवधिको तुलनामा २४.५० प्रतिशतले बढी हो । अघिल्लो वर्षको सोही अवधिमा बैंकले १ अर्ब ८५ करोड ८६ लाख रुपैयाँ खुद नाफा कमाएको थियो।

त्यस्तै, बैंकको सञ्चालन मुनाफा ३५.९० प्रतिशतले वृद्धि भई ३ अर्ब २२ करोड २५ लाख रुपैयाँ पुगेको छ। गत आर्थिक वर्ष २०८२/८३ को पहिलो त्रैमासमा बैंकको सञ्चालन मुनाफा २ अर्ब ३७ करोड रुपैयाँ हाराहारी रहेको थियो।

बैंकको नाफा वृद्धिमा कर्जा नोक्सानी व्यवस्थापन खर्चमा आएको कमी र गैरब्याज आम्दानीमा भएको उल्लेख्य वृद्धिले महत्वपूर्ण भूमिका खेलेको छ।

समीक्षा अवधिमा बैंकको कर्जा नोक्सानी व्यवस्थापन खर्च (इम्पेयरमेन्ट चार्ज) ५१.६९ प्रतिशतले घटेर ४८ करोड ८३ लाख रुपैयाँमा सीमित भएको छ। अघिल्लो वर्षको पहिलो त्रैमासमा यस्तो खर्च १ अर्ब १ करोड ९ लाख रुपैयाँ थियो। यसरी कर्जा जोखिम व्यवस्थापनका लागि छुट्याउनुपर्ने रकममा आएको कमीले बैंकको नाफा वृद्धिमा सकारात्मक योगदान दिएको देखिन्छ।

बैंकको मुख्य आम्दानीको स्रोत खुद ब्याज आम्दानीमा भने सामान्य सुधार देखिएको छ। अघिल्लो वर्ष ४ अर्ब १३ करोड ३० लाख रुपैयाँ रहेको खुद ब्याज आम्दानी चालु आर्थिक वर्षको पहिलो त्रैमासमा १.४५ प्रतिशतले बढेर ४ अर्ब १९ करोड ३२ लाख रुपैयाँ पुगेको छ।

त्यस्तै, गैरब्याज आम्दानीमा भने उल्लेख्य वृद्धि भएको छ। बैंकको खुद शुल्क तथा कमिसन आम्दानी ३४.५० प्रतिशतले बढेर १ अर्ब २२ करोड १२ लाख रुपैयाँ पुगेको छ। अघिल्लो वर्ष यस्तो आम्दानी ९० करोड ७६ लाख रुपैयाँ थियो। त्यस्तै, खुद ट्रेडिङ आम्दानी ४४.७० प्रतिशतले बढेर ४१ करोड २१ लाख रुपैयाँ पुगेको छ।

बैंकको कुल निष्क्रिय कर्जा (एनपीएल) अघिल्लो वर्षको पहिलो त्रैमासमा ४.९८ प्रतिशत रहेकोमा चालु आर्थिक वर्षको सोही अवधिमा घटेर ४.७९ प्रतिशतमा झरेको छ।

त्यस्तै, खुद निष्क्रिय कर्जा ०.९५ प्रतिशतबाट घटेर ०.६० प्रतिशत कायम भएको छ। निष्क्रिय कर्जाविरुद्धको कर्जा नोक्सानी व्यवस्थापन कभरेज पनि १०९.६३ प्रतिशतबाट बढेर १२०.१७ प्रतिशत पुगेको छ। यसले बैंकको कर्जा जोखिम व्यवस्थापन क्षमतामा सुधार आएको संकेत गर्छ।

त्यस्तै, आधार दर (बेस रेट) ५.४० प्रतिशतबाट घटेर ४.६१ प्रतिशत कायम भएको छ। बैंकको औसत ब्याजदर अन्तर (स्प्रेड रेट) पनि ३.४८ प्रतिशतबाट घटेर ३.१७ प्रतिशतमा आएको छ।

बैंकको कर्जा–निक्षेप अनुपात ७०.११ प्रतिशत र तरलता अनुपात ३८.४१ प्रतिशत रहेको छ।

नाफामा भएको वृद्धिसँगै बैंकको प्रतिसेयर आम्दानी (ईपीएस) पनि बढेको छ। अघिल्लो वर्ष १९ रुपैयाँ ५१ पैसा रहेको वार्षिकीकरण गरिएको ईपीएस चालु आर्थिक वर्षको पहिलो त्रैमासमा बढेर २३ रुपैयाँ ३५ पैसा पुगेको छ।

बैंकको पुँजीमा प्रतिफल (आरओई) ११.०१ प्रतिशतबाट बढेर १३.२९ प्रतिशत पुगेको छ भने सम्पत्तिमा प्रतिफल (आरओए) १.०५ प्रतिशतबाट बढेर १.१२ प्रतिशत कायम भएको छ। बैंकको मूल्य आम्दानी अनुपात १०.०८ गुणा रहेको छ।

ग्लोबल आइएमई बैंकको चुक्ता पुँजी ३९ अर्ब ६४ करोड ४ लाख रुपैयाँ रहेको छ भने जगेडा कोषमा २७ अर्ब ९६ करोड ६९ लाख रुपैयाँ सञ्चित छ। बैंकको प्रतिसेयर नेटवर्थ १७५ रुपैयाँ ७७ पैसा र पुँजी पर्याप्तता अनुपात ११.३२ प्रतिशत रहेको छ।

समीक्षा अवधिसम्म बैंकको वितरणयोग्य मुनाफा २ अर्ब ७ करोड २० लाख रुपैयाँ पुगेको छ।