सिप्रदी ग्रुपको टाटा गाडी व्यापार ३० प्रतिशत बढ्यो, एक वर्षमा २४ अर्ब कारोबार

काठमाडौं। सिप्रदी ग्रुपले सञ्चालन गरिरहेको सिप्रदी ट्रेडिङ प्राइभेट लिमिटेडको टाटा गाडी व्यापार ३० प्रतिशत बढेको छ। एक वर्षमा कम्पनीले २४ अर्ब आठ करोड रुपैयाँको टाटा गाडी, मोबिल र एक्साइड ब्याट्रीको व्यापार गरेको छ।

सन् २०२४ मा सिप्रदीको गाडी व्यापार १८ अर्ब ५८ करोड आठ लाख रुपैयाँ थियो। एक वर्षमा सिप्रदीको गाडी व्यापार साढे पाँच अर्ब रुपैयाँ बढेको रेटिङका लागि सार्वजनिक गरेको वित्तीय विवरणमा उल्लेख छ।

कम्पनीले २०२३ मा १८ अर्ब ३० करोड २०२२ मा २८ अर्ब ९५ करोड, २०२१ मा २५ अर्ब ४१ करोड रुपैयाँको गाडी व्यापार गरेको थियो।

गत वर्ष कूल व्यापारमा कमर्शियल भेहिकलको हिस्स ६९ प्रतिशत रहेको छ। कारोबार वृद्धिसँगै कम्पनीको अपरेटिङ प्रोफिट मार्जिन सामान्य बढेर २.७ प्रतिशत पुगेको छ। यसअघि यस्तो मार्जिन २.२ प्रतिशत थियो। वर्षौंदेखि टाटा मोटर्सले नेपालमा बलियो ब्रान्ड बनाएको छ। जसले कमर्सियल भेहिकलमा खण्डमा अग्रणी स्थान कायम राख्न सफल भएको दाबी सिप्रदीको छ।

कम्पनीले कमर्शियल भेहिकल खण्डमा प्रमुख बजार हिस्सा ६० देखि ६५ प्रतिशत कायम राखेको छ। देशभर आफ्नो स्वामित्वमा रहेका चार शोरूमहरू, १४ डिलरहरू र विभिन्न बिक्री बिन्दुसहितको विविध बिक्री नेटवर्क सञ्चालन गर्दछ।

कम्पनीको आम्दानीको आधार पनि विविध छ। कमर्शियल र प्राइभेट भेहिकल बिक्री, वर्कसप सेवाहरू, ब्याट्री र लुब्रिकेन्टबाट आम्दानी हुने गरेको छ। नेपालमा इन्टरनल कम्बस्ट इन्जिन (आईसीई) आधारित प्राइभेट खण्डमा स्थापित ब्रान्डहरू जस्तै हुन्डाई, मारुती सुजुकी र कियासँग कडा प्रतिस्पर्धा गर्नुपरेको छ।

साथै इभी खण्डमा बिवाइडी र एमजी जस्ता ब्रान्डहरूसँग प्रतिस्पर्धा बढ्दो छ। वर्षौंदेखि कम्पनीको सेयरधनीलाई दिने लाभांश उच्च रहेको छ।

गत तीन वर्षमा औसतमा नाफाको ६८ प्रतिशत लाभांश वितरण गरेको छ। यो वर्षको लाभाशं घोषणा नभएको कम्पनीले जनाएको छ।

सन् १९७९ मा स्थापित सिप्रदी ट्रेडिङ नेपालमा टाटा ब्रान्डको गाडी १९८२ देखि कमर्शियल भेहिकल र १९९२ देखि प्राइभेट भेहिकल, एक्साइड ब्याट्री सन् २००० देखि र म्याक लुब्रिकेन्ट सन् २००२ देखि नेपालमा बिक्री वितरण सुरु गरेको हो।

सिप्रदी ग्रुपका अध्यक्ष सिद्धार्थ शम्शेर राणा हुन्। कम्पनीले १३ अर्ब ७५ करोड रुपैयाँ ऋणको रेटिङ गराएको छ। यस्तै गाडी किन्नका लागि वित्तीय मध्यस्तकर्तामा ग्रुपले सिप्रदी हायर पर्चेज प्रालि सञ्चालन गरिरहेको छ।