बत्तिसपुतलीमा डेढ अर्ब लगानीमा ‘मन्नत’ बुटिक होटल बन्दै, आउँदो पुसमा सफ्ट लञ्चको तयारी

काठमाडौँ: पछिल्ला वर्ष मुलुकमा प्रमुख शहर र पर्यटकीय गन्तव्यहरुमा तारे र बुटिक स्तरिय होटल निर्माण भइरहेका छन्। होटल क्षेत्रमा बैंक तथा वित्तीय संस्थाले पनि लगानी बढाइरहेका छन्। राजधानीको बत्तिसपुतलीमा सेक्योर हस्पिटालिटी प्रालिले बुटिक होटल ‘मन्नत’ बनाइरहेको छ। होटल पूर्वाधार बनाउन एक अर्ब ४० करोड ६० लाख रुपैयाँ लाग्ने अनुमान गरिएको छ।

प्रस्तावित होटलमा ४० कोठा हुने भएको छ। हालसम्म ८५ प्रतिशत भौतिक र ९० प्रतिशत वित्तीय प्रगति भएको छ। होटल आगामी जनवरीमा सफ्टलञ्च गर्ने लक्ष्य व्यवस्थापनले लिएको छ। आगामी २०२६ को जुनदेखि होटल पूर्ण क्षमतामा सञ्चालनमा आउने भएको छ। सेक्योर हस्पिटालिटीले होटल मन्नत ब्राण्डमा सञ्चालन गर्ने भएको हो। पहिला होटल एक अर्ब १७ करोड ४० लाख रुपैयाँ लागत अनुमान गरिएको थियो।

कोभिड महामारीपछि समय लम्बिँदा लागत पनि बढेको सेक्योर हस्पिटालिटीले जनाएको छ। ७० प्रतिशत बैंकको ऋण र बाँकी ३० प्रतिशत संस्थापकको स्वपुँजी(इक्विटी) हुने गरी लगानी संरचना बनाइएको छ। सेक्योर्डले ९९ करोड ४७ लाख रुपैयाँ ऋणको रेटिङ गराएको छ।

ठूलो संख्यामा संगठित र असंगठित खेलाडीहरूको उपस्थितिले होटल उद्योगमा कडा प्रतिस्पर्धा छ। होटल उद्योग धेरै हदसम्म विदेशी पर्यटकको आगमनमा निर्भर भएकोले सेक्योरको सञ्चालनमा आएपछि अवस्थित खेलाडीहरूसँग प्रतिस्पर्धा गर्ने क्षमता हेर्न बाँकी छ।

सेक्योर हस्पिटालिटी स्न २०१९ नोभेम्बरमा स्थापना भएको हो। होटलमा सुविधाजनक बैठक हल, सम्मेलन हललगायत अन्य सुविधाहरू समावेश छन्। होटल दिलकुमार श्रेष्ठले निर्माण थालेका हुन्। त्रिभुवन अन्तर्राष्ट्रिय विमानस्थलबाट केवल २.२ किलोमिटर दुरीमा रहेको छ।

होटल नजिकैको आकर्षणहरू जस्तै पवित्र पशुपतिनाथ मन्दिर १.६ किलोमिटर, प्रतिष्ठित स्वयम्भुनाथ स्तूप ७.४ किलोमिटर, काठमाडौँ दरबार स्क्वायर ४.९ किलोमिटर र बौद्धनाथ स्तुपा ४.७ किलोमिटर दुरीमा छ।