रोयल इनफिल्डको हन्टर ३५० नयाँ रङ, फिचर र शैलीसहित नेपाली बजारमा

काठमाडौँ: रोयल इनफिल्डले आफ्नो लोकप्रिय स्ट्रिट रोड्स्टर मोडेल हन्टर ३५०को नयाँ संस्करण नेपाली बजारमा सार्वजनिक गरेको छ। ‘कुल’ शहरी जीवनशैलीबाट प्रेरित रङ, सुधारिएको सस्पेन्सन र सहज एर्गोनोमिक डिजाइनसहितको बीएस भीआई नयाँ हन्टर ३५० कम्पनीले सोमबार काठमाडौँमा प्रस्तुत गरेको हो।

कम्पनीका अनुसार नयाँ हन्टर ३५० रियो सेतो, टोकियो कालो, लन्डन रातो र ग्रेफाइट खैरो गरी चार स्ट्रीट–इन्स्पायर्ड रङमा उपलब्ध छ। यीमध्ये तीन रङ विश्वका सांस्कृतिक पहिचानका प्रतीकसम्बन्धी अवधारणाबाट तयार गरिएको दाबी कम्पनीले गरेको छ—रियोका सेता तट, लन्डनका राताका ‘ब्रिक लेन’ र टोकियोका रातो–कालो शहरी सडकबाट प्रेरित बताइन्छ।

ग्रेफाइट खैरोले मोटरसाइकललाई ‘स्टेल्थ’ लुक र दमदार उपस्थिति दिएको कम्पनीको भनाइ छ।

नयाँ संस्करणमा कम्पनीले पहिलोपटक स्लिप असिस्ट क्लच जडान गरेको छ। परिमार्जित पछाडिको सस्पेन्सन, १६० एमएमसम्म बढेको ग्राउण्ड क्लियरेन्स, सुधारिएको सीट, डुअल च्यानल एबिएस, एलईडी हेडलैम्प र थप सहज एर्गोनोमिक डिजाइनसमेत समावेश छन्। साथै, ट्रिप नेभिगेटर विकल्पसमेत राखिएको छ।

हन्टर ३५०मा राखिएको ३४९ सीसी जे सिरिज इन्जिनले शहरी सडकका दैनिकीमा चुस्ती र सहजता प्रदान गर्ने दाबी गरिएको छ। सन् २०२२ मा बजारमा आएको यो मोडेलले हालसम्म विश्वभर सात लाखभन्दा बढी राइडर आकर्षित गरिसकेको कम्पनीको भनाइ छ।

रोयल इनफिल्डका प्रमुख व्यावसायिक अधिकृत यादविन्दर सिंह गुलेरियाले नेपालमा मोटरसाइकल दैनिकीसँगै जीवनशैलीकै हिस्सा बनेकाले नयाँ हन्टर ३५० नेपालका भौगोलिक र शहरी गतिसँग उपयुक्त हुने बताएका छन्। उनले भने, ‘युवा पुस्ताको ऊर्जा र शहरी गतिलाई ध्यानमा राखेर नयाँ हन्टर ३५० ल्याएका हौँ। यो नेपालका जीवन्त शहरी सडकका लागि उपयुक्त मोडेल हो।’

नयाँ हन्टर ३५० को नेपाली बजारमा सिंगगल टोनको ४ लाख ९४ हजार ९०० रुपैयाँ र डुअल टोनको ४ लाख ९९ हजार ९०० रुपैयाँ रहेको छ।