जुम्लाबाट ४१ करोड २९ लाखको स्याउ बिक्री, १८ हजार टन उत्पादन

जुम्ला। जुम्लामा यो वर्ष १८ हजार २४५ टन स्याउ उत्पादन भएको छ। उक्त स्याउ बिक्रीबाट ४१ करोड २९ लाख ८९ हजार रुपैयाँ आम्दानी भएको छ।

जिल्लस्थित कृषि विकास कार्यालयको तथ्याङ्कअनुसार यहाँका आठवटै स्थानीय तहका २४ हजार ८३८ परिवारमध्ये १९ हजार १५० परिवार स्याउखेतीमा संलग्न छन्।

जिल्लामा कूल खेतीयोग्य जमिन ३९ हजार ४३५ हेक्टर रहेको कार्यालयले जनाएको छ। त्यसमध्ये स्याउखेती गरिने क्षेत्रफल आर्थिक वर्ष २०८१/०८२ मा चार हजार ३२५ हेक्टर रहेकामा चालू आर्थिक वर्षमा बढेर चार हजार ४४५ हेक्टर पुगेको कार्यालयका प्रमुख रामभक्त अधिकारीले जानकारी दिए।

उनका अनुसार चालु आर्थिक वर्षमा दुई हजार १२५ हेक्टरमा मात्रै स्याउ फलेको छ।

पछिल्लो समय जिल्लामा स्याउखेती गर्ने किसान बढ्दै गएका छन्। आर्थिक वर्ष २०८१०८२ मा स्थानीय जातका र उच्च घनत्व (फुजी) स्याउको कूल उत्पादन २० हजार ५१२ टन भएको थियो।

चालु आर्थिक वर्षमा उत्पादन घटेर १८ हजार २४५ टनमा सीमित भएको कृषि विकास कार्यालय प्रमुख अधिकारीले जानकारी दिए। उहाँका अनुसार यो वर्ष असिना र वेमौसमी वर्षाले गर्दा १० प्रतिशतले उत्पादन घटेको हो।

अहिले एक हजार ७६५ टन स्याउ भण्डारगृहमा राखिएको छ। यो वर्ष जिल्लामा स्याउ बिक्रीमा संलग्न किसान सात हजार ३५० र व्यापारी ६०३ रहेका कृषि विकास कार्यालयले जनाएको छ। नासो र कोसेलीमार्फत दुई हजार ६४८ टन स्याउ जिल्लाबाट बिक्री भएको छ।

जिल्लामा हाल ५२ हेक्टर क्षेत्रफलमध्ये ४० हेक्टरमा उच्च घनत्वको स्याउ उत्पादन हुने गरेको छ। यो वर्ष जिल्लामा ५८६ टन उच्च घनत्व जातको स्याउ उत्पादन भएको छ। त्यसमध्ये ४२७ टन निर्यात भएको छ।

जिल्लामा हाल उत्पादित स्याउका जातहरूमा ‘रेडडेलिसियस’, ‘रोयलडेसियस’, ‘गोल्डेन डेलिसियस’, ‘रिचारेड’ र ‘जनाधन’ रहेका कृषि विकास कार्यालयले जनाएको छ। हाल उत्पादित उन्नत जातमध्ये फुजी गाला (इटालियन जात)को स्याउखेती हुने गरेको छ।

नेपाल कृषि अनुसन्धान परिषद् (नार्क)ले नयाँ सिफारिस गरेका जातमध्ये ‘स्टारकिमसन’, ‘डेलिसियस’, ‘बाइट एन अर्ली’ र ‘स्टार्क स्पर गोल्डेन’ जात रहेका भन्दै उनले सोको खेतीबारे अध्ययन भइरहेको जानकारी दिए।

गत वर्षको तुलनामा स्याउ उत्पादन कम भए पनि यो वर्ष किसानले मूल्य पाएकाले आम्दानी भने बढी भएको अनुमान गरिएको छ।