वीरगञ्जबाट ७२ अर्बको पेट्रोलियम पदार्थ आयात

पर्सा। वीरगञ्ज हुँदै चालू आर्थिक वर्षको पाँच महिनामा ७२ अर्ब २८ करोड रुपैयाँबराबरको पेट्रोलियम पदार्थको आयात भएको छ। वीरगञ्ज भन्सार कार्यालयले पाँच थरिका पेट्रोलियम पदार्थको आयातबाट मात्र सो अवधिमा ३० अर्ब २५ करोड रुपैयाँ राजस्व संकलन गरेको छ।

वीरगञ्ज भन्सार कार्यालयका सूचना अधिकृत उदयसिंह विष्टले चालु आवको पाँच महिनामा पेट्रोलियम पदार्थको आयात बढेसँगै राजस्वमा पनि वृद्धि भएको बताए।

गत आर्थिक वर्षको पाँच महिनाको तुलनामा चालु आवको सोही अवधिमा भने ६.४२ प्रतिशत अर्थात् एक अर्ब ८३ करोड रुपैयाँ बढी राजस्व संकलन भएको हो।

जबकि गत आवको पाँच महिनामा भने ६९ अर्ब १५ करोड रुपैयाँबराबरका पाँच थरिका पेट्रोलियम पदार्थको आयात भएको थियो। चालू आवको पाँच महिनामा वीरगञ्ज हुँदै ३५ अर्ब ३१ करोड रुपैयाँको डिजेलको आयात भयो।

त्यसैगरी १७ करोड ३६ लाख मूल्यको पेट्रोल र १२ अर्ब १७ करोडको एलपी ग्यासको पनि आयात भयो। त्यस्तै सात अर्ब २५ करोडको एटिएफ र १९ करोडको मट्टितेल आयात भएको छ।