निजी क्षेत्रले बनाउँदैछ देशमै पहिलो क्रिकेट रंगशाला

भैरहवा- रुपन्देही जिल्ला तिलोत्तमा नगरपालिकाको पिछडिएको क्षेत्रमा पर्छ वडा नम्बर १७। यही वडामा आगामी पाँच वर्षभित्र २५ हजार दर्शक क्षमताको अन्तर्राष्ट्रिय क्रिकेट रंगशाला बन्ने भएको छ। अस्ट्रेलियामा रहेको एक्स्ट्राटेक ओभल कम्पनीले रंगशाला निर्माणका लागि मंगलबार शिलान्यास गरेको हो।

सरकारले देशका विभिन्न स्थानमा क्रिकेट रंगशाला बनाउने घोषणा गरेको छ। तर उसले घोषणा गरेको लामो समय भइसक्दा पनि रंगशाला बन्न सकेका छैनन्।

‘काठमाडौँको मूलपानी रंगशालामा बजेट विनियोजन हुन थालेको १७ वर्ष भयो। तर अहिलेसम्म पनि निर्माणको काम सकिएको छैन,’ नेपाल क्रिकेट संघका केन्द्रीय सदस्य प्रशान्त विक्रम मल्लले शिलान्यास कार्यक्रममा भने, ‘हामीले पनि भैरहवामा सिद्धार्थ रंगशाला बनाउने भनेको हो। तर बजेट नै पर्दैन। यो वर्ष त बजेट नै नदिने तयारी थियो। हामीले टेबल ठोकेर ४१ लाख पारेका छौँ।’

देशका क्रिकेट मैदानको अवस्था उस्तै छ। त्रिवि मैदानमा ‘फ्लड लाइट’ राख्ने योजना बजेटमा समावेश हुन थालेको तेस्रो वर्ष हुँदा पनि काम सुरु भएको छैन।

सरकारी मात्र होइन निजी स्तरको मैदान निर्माण पनि उस्तै छ। धुर्मुस-सुन्तली फाउन्डेसनले चितवनमा बनाउने भनेको गौतमबुद्ध अन्तर्राष्ट्रिय क्रिकेट मैदान अलपत्र अवस्थामा छोडिएको छ। इटहरीको क्रिकेट रंगशालादेखि धनगढीको फाप्ला क्रिकेट मैदानसम्मका हालत उस्तै छ।

‘हामी बाँकी आयोजना जस्तो गर्दैनौँ। काम समयमै सम्पन्न गर्छौँ,’ शिलन्यास कार्यक्रममा कम्पनीका सीईओ विनोद कुँवरले भने, ‘मैले विदेशमा गएर समयको महत्त्व बुझेँ। त्यहाँ समयमा नै काम सम्पन्न हुन्छ। हामीले पनि यो काम आयोजना समयमा सम्पन्न गर्ने छौं।’

रुपन्देहीको भैरहवाबाट करिब ९ किलोमिटर पूर्वमा रहेको यो गाउँलाई स्थानीयले पूवी दरखसवा भनेर चिन्छन्। सोही ठाउँमा कुँवरले दुई वर्षअघि जमिन किनेका थिए। उनका अनुसार जमिन खरिदको प्रक्रिया अझै जारी छ।

‘यो गाउँ र १७ नम्बर वडा यो नगरपालिकाकै दुर्गम ठाउँका रुपमा चिनिएको थियो। तर अब त्यस्तो रहेन। यहाँ रंगशाला बनेपछि देशविदेशका मानिस आउने छन,’ तिलोत्तमा नगरपालिकाकी उपप्रमुख जागेश्वरदेवी चौधरीले भनिन, ‘यहाँ पनि बस्ती ठूलो बन्नेछ। मैले यो रंगशालामा महिला टिमको प्रतियोगिता आयोजना गर्ने विचार गरेकी छु।’ चौधरीले यो रंगशाला चाँडै बन्नेमा आफू विश्वस्त रहेको पनि बताइन्।

कुँवरका अनुसार यो वर्ष नै ५ हजार दर्शक क्षमताको भीआईपी प्यारापिटसहितको मैदान तयार हुनेछ। रंगशाला बनाउने काम दुई सातायता जारी छ। अहिले कपिलवस्तु र तनहुँबाट ५५ ट्रक माटो ल्याएर मैदानमा सम्याउने काम भइसकेको छ।

‘यसको मैदानको लागि ७० प्रतिशत ‘क्ले’ भएको माटो चाहिन्छ। विशेष माटो चाहिने भएकाले टाढा बाट ल्याउनु परेको हो,’ दुaईमा १७ वर्ष क्युरेटरको काम गरेर फर्किएका माधव पाठकले नेपाल क्लिक्ससँग भने। उनले यो मैदानमा पनि अहिले क्युरेटरको जिम्मेवारी सम्हालेका छन्।

बर्सेनि ५ हजार क्षमता थप गर्दै २५ हजार क्षमताको बनाउने एक्स्ट्राटेक ओभलको चिफ अपरेटिङ अफिसर सुदीक्षा गौतमले योजना सुनाइन्। मैदानको लागि पूर्व अन्तर्राष्ट्रिय क्रिकेटर शक्ति गौचन ब्रान्ड एम्बासडर तोकिएका छन्। आफ्नो क्षेत्रमा मैदान बन्ने भएपछि आफूले क्रिकेट सिकाइरहेका खेलाडीलाई सजिलो हुने उनले बताए।

‘मैले पनि मैदान बनाउने भनेर सोचेको हो। तर कुरा बजेटकै हुँदो रहेछ। तर यो मैदान बन्यो भने यहाँको बालबालिकालाई ठूलो सहयोग हुन्छ,’ उनले भने, ‘म यो प्रोजक्टबाट धेरै खुसी छु। यो मेरो सपना थियो।’