मनमैजुमा १.३० अर्ब लगानीमा हाउजिङ परियोजना ल्याउँदै व्यवसायी ज्ञानेन्द्रलाल प्रधान, १५ युनिट सम्पन्न

काठमाडौँ: बढ्दो सहरीकरण र बदलिँदो जीवनशैलीसँगै राजधानीलगायत प्रमुख सहरहरुमा हाउजिङमा आकर्षण बढ्दै गएको छ। ठूला व्यवसायिक घरनाहरु पनि हाउजिङ परियोजनामा लगानी बढाइरहेका छन्। यस्तै जलविद्युत व्यवसायी ज्ञानेन्द्रलाल प्रधानले लगानी विविधिकरण गरेर हाउजिङ क्षेत्रमा विस्तार गरेका छन्।

जलविद्युत, सेयर बजार र हस्पिटालिटी क्षेत्रमा लगानी गरिरहेका व्यवसायी प्रधानले गृहलक्ष्मी रियालिटी लिमिटेडमार्फत हाउजिङ व्यवसायमा प्रवेश गरेका हुन्।

प्रधानले एक अर्ब २९ करोड ९९ लाख रुपैयाँ लगानीमा राजधानीको मनमैजु, फुटुङमा ३५ वटा रेजिडेन्स (आवास) निर्माण गरिरहेका छन्। हालसम्म १५ आवासको निर्माण सम्पन्न भएको गृहलक्ष्मीले जनाएको छ। यस्तै उनले गृहलक्ष्मीले व्यावसायिक भवन निर्माण सुरु गर्न लागेका छन्।

कूल लागत मध्ये ४० करोड रुपैयाँ ऋण, ७५ करोड रुपैयाँ स्वपुँजी (इक्विटी) १४ करोड ९० लाख रुपैयाँ हाउजिङ युनिट एडभान्स बुकिङबाट जुटाइएको छ। हाउजिङ परियोजनामा ऋण र स्वपुँजी अनुपात ३१ः५८ः११ प्रतिशत रहेको छ।

गृहलक्ष्मीले बैंकसँग ऋण सम्झौता गरेर लगानी जुटाइसकेको छ। जग्गा खरिदको काम सकिएको छ। हालसम्म ८० प्रतिशत वित्तीय प्रगति भएको कम्पनीले जनाएको छ। जग्गाको आंशिक बिक्री साथै आवास एकाइहरू सुरु गरिएको छ।

आवास परियोजना र व्यावसायिक परिसर फुटुङ, मनमैजुमा अवस्थित छ। जुन गोंगाबु बसपार्कबाट ४.२ किलोमिटर टाढा छ। विभिन्न सुविधाहरूको उपलब्धता भएको उत्कृष्ट स्थानले बासिन्दाहरूलाई थप फाइदा दिन्छ।

राजधानी शहर भएकोले काठमाडौँमा धेरै शैक्षिक संस्थाहरू, अस्पतालहरू, बैंकका एटीएमहरू, शपिङ मलहरू, खुद्रा पसलहरू, बैंकहरू र अन्य रोजगारीका अवसरहरू नजिकै छन्। साथै, शहरको भीडभाडबाट टाढा बस्न मानिसहरूको बढ्दो माग, राम्रो सेवाहरू र सुविधाहरूमा पर्याप्त पहुँच भए पनि मनमैजुलाई आवासीय उद्देश्यका लागि अनुकूल स्थानमा मानिन्छ।

हाउजिङ परियोजना थाल्न सन् २०२३ को जुलाइमा स्थापना भएको रियल इस्टेट कम्पनी गृहलक्ष्मी रियालिटीको ४६ प्रतिशत हिस्सा प्रधानको छ । साधारण सेयर (आइपीओ) निष्कासन गर्न कम्पनी पब्लिक लिमिटेडमा परिणत भइसकेको छ। कम्पनीको साझेदार मनमैजु हाउजिङ कम्पनी लिमिटेड रहेको छ।

प्रधानले त्रिवेणी र विशाल ग्रुपको साझेदारीमा १८० मेगावाटको कालिगण्डकी गर्ज बनाउँदै छन्। आयोजना बनाउन ४० अर्ब रुपैयाँ लागत अनुमान गरिएको छ। आयोजना बनाउन बैंकबाट ३० अर्ब रुपैयाँ वित्तीय व्यवस्थापन सम्झौता भइसकेको छ। यस्तै २० मेगावाटको मोदी जलविद्युत आयोजना सञ्चालनमा छ।

यस्तै साझेदारीमा २६ मेगावाटको खुदी जलविद्युत आयोजना पनि निर्माण भइरहेको छ। प्रधानले काभ्रेको बनेपाको बासडोलमा पाँचतारे स्तरको आरुण्य नेचर रिसोट निर्माण गरिरहेका छन्। रिसोर्ट छिट्टै सञ्चालनको तयारी भएको छ। एक दशकमा सम्पन्न हुने रिसोर्ट परियोजनामा १० अर्ब रुपैयाँ लगानी हुने प्रधानले बताएका छन्।