नेपाल इन्भेष्टमेण्ट मेगा बैंक ४१औँ वर्षमा प्रवेश

काठमाडौँः नेपाल इन्भेष्टमेण्ट मेगा बैंक ४१औँ वर्षमा प्रवेश गरेको छ। चार दशकभन्दा लामो यात्रामा बैंकले ग्राहक, सेयरधनी, नियामक निकाय, साझेदार संस्था तथा कर्मचारीहरूको विश्वास र सहयोगका आधारमा वित्तीय क्षेत्रमा सशक्त उपस्थिति कायम गरेको जनाएको छ। ऐतिहासिक अवसरमा बैंकले सम्पूर्ण सरोकारवालाप्रति आभार व्यक्त गरेको छ।

४०औँ वार्षिकोत्सवका अवसरमा अध्यक्ष पृथ्वीबहादुर पाँडेले बैंकको सफल यात्रामा साथ दिने सबैप्रति कृतज्ञता व्यक्त गर्दै आगामी दिनमा अझ पारदर्शी, जिम्मेवार र नवप्रवर्तनमुखी बैंकिङ सेवा प्रदान गर्ने प्रतिबद्धता जनाए।

प्रमुख कार्यकारी अधिकृत ज्योति प्रकाश पाण्डेले डिजिटल रूपान्तरणलाई तीव्रता दिँदै ग्राहक अनुभवलाई सरल, सुरक्षित र प्रभावकारी बनाउने दिशामा बैंक अग्रसर रहने बताए। “समृद्धिको पथमा सँगै अघि बढ्दै” नारासहित ग्राहक–केन्द्रित नवीन सेवा विस्तारलाई प्राथमिकता दिइने उनको भनाइ थियो।

वार्षिकोत्सवको अवसर पारेर बैंकले वित्तीय साक्षरतासम्बन्धी चित्रपुस्तक प्रकाशन गर्ने परम्परालाई निरन्तरता दिएको छ। आठौँ संस्करणका रूपमा ‘३ आर सुन्दर संसार’ नामक चित्रकथा सार्वजनिक गरिएको छ। पुस्तकमा वातावरणीय प्रदूषण, प्राकृतिक स्रोत संरक्षण र ग्लोबल वार्मिङजस्ता विषयलाई सरल तथा ज्ञानवर्द्धक शैलीमा प्रस्तुत गरिएको बैंकले जनाएको छ।

सामाजिक उत्तरदायित्वअन्तर्गत वातावरण संरक्षणप्रति बालबालिकामा सचेतना अभिवृद्धि गर्ने उद्देश्यले पुस्तक प्रकाशन गरिएको उल्लेख गरिएको छ।

यसैबीच, वार्षिकोत्सव दिवसका अवसरमा बैंकले नेपाल रेडक्रस सोसाइटीसँगको सहकार्यमा रक्तदान कार्यक्रम आयोजना गरेको छ। कार्यक्रममा बैंकका कर्मचारीहरूको सक्रिय सहभागिता रहेको थियो।