उच्च अंकले घट्यो नेप्से परिसूचक, हिमालयन रि–इन्स्योरेन्सको कारोबार उच्च

काठमाडौँः साताको चौथो कारोबार दिन नेपाल स्टक एक्सचेञ्ज (नेप्से) परिसूचक उच्च अंकले घटेको छ । आज नेप्से परिसूचक ७४.७३ अंक घटेर २ हजार ७७६.३६ विन्दुमा झरेको छ।

नेप्से घटेपनि यस दिन कारोबार रकम भने सामान्य बढेको छ। मंगलबार ११ अर्ब ११ करोड रुपैयाँबराबरको सेयर खरिदबिक्री भएकोमा यस दिन १२ अर्ब १० करोड ९५ लाख २५ हजार रुपैयाँबराबरको ३ करोड २ लाख ९२ हजार कित्ता सेयर खरिदबिक्री भएको छ।

यस दिन ६ स्टकको सेयर सकारात्मक सर्किट लेभलमा कारोबार भएको छ। यस दिन रिलायन्स स्पिनिङ्ग मिल्स, सुपर खुदी हाइड्रोपावर, भुजुङ्ग हाइड्रोपावर, रिज लाइन इनर्जी, सूर्यकुण्ड हाइड्रो इलेक्ट्रिक र होटल फरेष्ट इनको सेयर सकारात्मक सर्किट लेभलमा कारोबार भएको हो। कारोबारमा आएको नेपाल पुनर्बीमा कम्पनीको सेयरमूल्य यस दिन सर्वाधिक ९.८४ प्रतिशत घटेको छ।

कारोबार रकमका आधारमा यस दिन हिमालयन रि–इन्स्योरेन्स शीर्ष स्थानमा रहेको छ। यस दिन सो कम्पनीको ७१ करोड ३१ लाख रुपैयाँबराबरको सेयर कारोबार भएको छ।