अबदेखि शुक्रबार सेयर बजार खुल्ने, आइतबार बन्द हुने

काठमाडौँ: अबदेखि शुक्रबार पनि सेयर बजार खुल्ने भएको छ। सरकारले पेट्रोलियम पदार्थको खपत घटाउन शनिबार र आइतबार सार्वजनिक बिदा दिने निर्णय गरेसँगै आइतबारको सट्टा शुक्रबार सेयर कारोबार हुने भएको हो।

आइतबार साँझ बसेको नेपाल स्टक एक्सचेन्ज (नेप्से)को सञ्चालक समितिको बैठकले आइतबारको सट्टा शुक्रबार सेयर बजार खोल्ने निर्णय गरेको प्रवक्ता मुराहरि पराजुलीले बताए। आइतबार भने सेयर बजार तथा नेप्से कार्यालय बन्द रहनेछ।

पेट्रोलियम पदार्थको आपूर्ति असहज बन्दै गएपछि सरकारले आइतबार पनि सार्वजनिक बिदा दिने निर्णय गरेको हो। सरकारका प्रवक्ता तथा शिक्षामन्त्री सस्मित पोखरेल का अनुसार, चैत २३ गतेदेखि लागू हुने गरी सरकारी कार्यालय र सम्पूर्ण शैक्षिक संस्थामा शनिबार र आइतबार बिदा दिइनेछ। अन्य कार्यदिनमा भने सबै सरकारी कार्यालयहरू बिहान ९ बजेदेखि बेलुका ५ बजेसम्म सञ्चालन हुनेछन्।

हालसम्म सेयर बजार आइतबारदेखि बिहीबारसम्म खुला रहँदै आएको थियो, जसमा हप्तामा ५ दिन कारोबार हुँदै आएको थियो। अब सरकारले आइतबार सार्वजनिक बिदा दिएपछि सो दिन कारोबार नहुने र त्यसको सट्टा शुक्रबार कारोबार हुनेछ।

यसअघि २०७९ सालमा पनि सरकारले पेट्रोलियम पदार्थको खपत घटाउन शनिबार र आइतबार सार्वजनिक बिदा दिने निर्णय गरेको थियो। त्यस समयमा पनि आइतबारको सट्टा शुक्रबार सेयर कारोबार गरिएको थियो। तर, परीक्षणकालका रूपमा लागू गरिएको यो निर्णय एक महिनामै फिर्ता लिइएको थियो।

अहिले पनि सोही अनुसार शुक्रबार सेयर कारोबार हुने भएको हो। हाल सेयर बजारसम्बन्धी विभिन्न नियमावली तथा विनियमावलीमा आइतबारदेखि बिहीबारसम्म कारोबार हुने उल्लेख भए पनि मन्त्रिपरिषद्को निर्णयका आधारमा ती व्यवस्था संशोधन नगरी शुक्रबार कारोबार सञ्चालन गरिने नेप्सेले जनाएको छ।