बैंकहरूको नाफा ४३ अर्ब ८८ करोड माथि, नबिल शीर्ष स्थानमा, कुमारी बैंकको छलाङ

काठमाडौँ: वाणिज्य बैंकहरूले चालू आर्थिक वर्ष २०८२/०८३ को फागुन मसान्तसम्म समग्र नाफामा सुधार गरेका छन्। नेपाल राष्ट्र बैंकले सार्वजनिक गरेको पछिल्लो तथ्यांकअनुसार सञ्चालनमा रहेका २० वटा वाणिज्य बैंकहरूले कुल ४३ अर्ब ८८ करोड ४९ लाख रुपैयाँ खुद नाफा आर्जन गरेका छन्।

यो गत वर्षको सोही अवधिको ४३ अर्ब ४९ करोड ६४ लाखको तुलनामा केही बढी हो। गत वर्षको तुलनामा यो वर्ष बैंकहरूको खुदनाफा ३८ करोड ८६ लाख रुपैयाँ बढेको सार्वजनिक गरिएको वित्तीय विवरणमा उल्लेख छ।

सञ्चालनमा रहेका २० वाणिज्य बैंकमध्ये ९ वटाको मात्रै नाफा बढेको छ भने अन्य ११ बैंकको नाफामा गिरावट आएको छ।

सर्वाधिक कमाउने नबिल

सार्वजनिक गरिएको तथ्यांकअनुसार नाफाका आधारमा नबिल बैंक सबैभन्दा अगाडि देखिएको छ। नबिल बैंकले फागुन मसान्तसम्म ६ अर्ब ६ करोड ४१ लाख रुपैयाँ खुदनाफा कमाएको छ। गत वर्ष सोही अवधिमा बैंकको नाफा ४ अर्ब ७८ करोड रुपैयाँ मात्र थियो।

त्यसैगरी, ग्लोबल आइएमई बैंक दोस्रो स्थानमा रहँदै ४ अर्ब ६२ करोड २६ लाख रुपैयाँ खुदनाफा कमाउन सफल भएको छ।

कुमारी र कृषि विकास बैंकको लोभलाग्दो वृद्धि

फागुनसम्म सबैभन्दा उत्साहजनक सुधार कुमारी बैंकमा देखिएको छ। गत वर्ष ९६ करोड ९१ लाख मात्र नाफा कमाएको कुमारी बैंकले यस वर्ष झण्डै २७५ प्रतिशतको वृद्धि गर्दै ३ अर्ब ६३ करोड रुपैयाँ नाफा पुर्याएको छ। कुमारी सबैभन्दा बढी प्रोभिजन गर्ने बैंक बन्दै आएको छ।

त्यस्तै, कृषि विकास बैंकले पनि आफ्नो नाफामा सुधार गरेको छ। गत वर्ष फागुन मसान्तसम्म ७ करोड ३८ लाख मात्र नाफा गरेको यस बैंकले यस वर्ष १ अर्ब २२ करोड १९ लाख रुपैयाँ नाफा कमाएको छ।

त्यस्तै, नेपाल इन्भेष्टमेन्ट मेगा बैंकले २ अर्ब ८८ करोड र प्राइम कमर्सियल बैंकले २ अर्ब ७४ करोड रुपैयाँ नाफा गरेका छन्।

मन्दीकाबीच बैंकिङ क्षेत्रमा उत्साह

अर्थतन्त्रमा केही शिथिलता देखिए पनि बैंकहरूको नाफामा आएको यो सुधारले वित्तीय क्षेत्र विस्तारै लयमा फर्किँदै गरेको संकेत गरेको छ। निक्षेप संकलन र कर्जा प्रवाहमा देखिएको सन्तुलन तथा बैंकहरूले खराब कर्जा व्यवस्थापनमा गरेको कडाइका कारण नाफामा सकारात्मक प्रभाव परेको विश्लेषण गरिएको छ।

यद्यपि, एनआइसी एशिया, लक्ष्मी सनराइज र नेपाल इन्भेष्टमेन्ट मेगा जस्ता केही वाणिज्य बैंकहरूको नाफामा भने गत वर्षको तुलनामा केही संकुचन आएको देखिन्छ।