आरबीजी इन्टरनेसनल बन्यो टोरियन एमपीएसको आधिकारिक नेपाल बिक्रेता

काठमाडौँ: क्रसिङ, स्क्रिनिङ तथा सामग्री प्रशोधन (मटेरियल प्रोसेसिङ) उपकरण निर्माण क्षेत्रमा विश्वस्तरमा परिचित कम्पनी टोरियन एमपीएस लिमिटेडले नेपालका लागि आफ्नो आधिकारिक बिक्रेताका रूपमा आरबीजी इन्टरनेसनल प्रालिलाई औपचारिक रूपमा नियुक्त गरेको छ।

यो साझेदारी होटल बराही प्लाजा, काठमाडौंमा आयोजित एक औपचारिक समारोहमार्फत सम्पन्न गरिएको हो। कार्यक्रममा टोरियन एमपीएस लिमिटेडका तर्फबाट ग्लोबल सेल्स डाइरेक्टर आनन्द मोहन तथा अन्तर्राष्ट्रिय बिक्री उपाध्यक्ष तरसेम पठानियाको उपस्थिति रहेको थियो।

त्यसैगरी, आरबीजी इन्टरनेसनल प्रालिका अध्यक्ष बलराम उपाध्याय, निर्देशक रवि रञ्जन कुमार तथा निर्देशक श्यामल झाको सहभागिताले यस सहकार्यप्रति कम्पनीको उच्चस्तरीय प्रतिबद्धता झल्काएको छ।

सन् २००५ मा स्थापना भएको टोरियन एमपीएस लिमिटेडले इन्जिनियरिङ उत्कृष्टता, उच्च कार्यसम्पादन र ग्राहककेन्द्रित समाधानमार्फत अन्तर्राष्ट्रिय बजारमा आफ्नो सशक्त पहिचान बनाएको छ। हाल कम्पनीको उपस्थिति उत्तर अमेरिका, रुस, मध्यपूर्वलगायत विभिन्न बजारहरूमा विस्तार भइरहेको छ। नेपालमा यो नियुक्ति उच्च सम्भावना भएका बजारहरूमा आफ्नो उपस्थिति थप सुदृढ गर्ने रणनीतिक कदमका रूपमा लिइएको छ।

आरबीजी इन्टरनेसनल प्रालि सन् २०१९ मा स्थापना भएको कम्पनी हो। यसले नेपालभर एडमिक्स्चर केमिकल, निर्माण उपकरण, रेडिमिक्स कंक्रिटसम्बन्धी सामग्री तथा वाटरप्रुफिङ समाधानहरूमा सक्रिय रूपमा सेवा दिँदै आएको छ। प्राविधिक दक्षता र परियोजना–केन्द्रित कार्यशैलीका कारण कम्पनीले बजारमा विश्वसनीयता हासिल गरेको छ।

अब टोरियन एमपीएस लिमिटेडसँगको सहकार्यमार्फत आरबीजी इन्टरनेसनल प्रालि क्रसर प्लान्ट क्षेत्रमा प्रवेश गर्दैछ। कम्पनीले गुणस्तरीय उपकरणसँगै प्रभावकारी बिक्रीपछिको सेवा प्रणाली विकास गरी छिटो सेवा, न्यून डाउनटाइम र दीर्घकालीन भरपर्दो सञ्चालन सुनिश्चित गर्ने लक्ष्य राखेको छ।

नेपालमा तीव्र गतिमा बढिरहेको जलविद्युत तथा पूर्वाधार विकाससँगै उच्च क्षमताका क्रसर प्लान्ट तथा सामग्री प्रशोधन उपकरणहरूको माग निरन्तर वृद्धि भइरहेको छ। यही आवश्यकतालाई सम्बोधन गर्न यो साझेदारी महत्वपूर्ण हुने विश्वास लिइएको छ।

यस सहकार्यले नेपालमा अत्याधुनिक क्रसिङ तथा स्क्रिनिङ समाधानहरूको पहुँच विस्तार गर्ने तथा देशको पूर्वाधार विकास र औद्योगिक प्रगतिमा सकारात्मक योगदान पुर्‍याउने अपेक्षा गरिएको छ।