धितोपत्र विनियमावली संशोधनः कम्पनीको सेयर मूल्य अब १५ प्रतिशतसम्म घटबढ हुने

काठमाडौं। नेपाल धितोपत्र बोर्ड (सेबोन) ले ‘धितोपत्र कारोबार सञ्चालन विनियमावली, २०७५’मा संशोधन गरेर छ। पूँजीबजारको कारोबारलाई थप फराकिलो र चलायमान बनाउन बोर्डले उक्त विनियमावली संशोधन गरेको हो।

संशोधित विनियमावली बोर्डले नेपाल स्टक एक्सेञ्ज (नेप्से) मा पठाईसकेको प्रवक्ता मुराहरी पराजुलीले जानकारी दिए।

पराजुलीका अनुसार सेबोनबाट विनियमावली संशोधनको आधिकारिक पत्र नेप्सेमा पुगे पनि प्राविधिक रुपमा कहिलेदेखि कार्यान्वयनमा लागू गर्ने निर्णय भने भइसकेको छैन। ‘अब चाँडै सञ्चालक समितिको बैठक बसेर कार्यान्वयनमा ल्याउने तयारीमा छौ,’ उनले भने।

संशोधित व्यवस्थाअनुसार अब सूचीकृत कम्पनीहरुको सेयर मूल्यमा लाग्दै आएको सर्किट सीमा र प्री–ओपन सेसनको मापदण्डमा परिवर्तन गरिएको नेप्से स्रोतले जनाएको छ।

नेप्सेका अनुसार सेबोनबाट स्वीकृत भई आएको संशोधित विनियमावलीमा सूचीकृत कम्पनीको दैनिक सेयर मूल्य घटबढ हुन पाउने सीमालाई १० प्रतिशतबाट बढाएर १५ प्रतिशत पुर्याइएको छ। जसअनुसार अब सूचीकृत कम्पनीको सेयरभाउ १५ प्रतिशतसम्म घट्न र बढ्न सक्नेछ।

त्यस्तै, नेप्से इन्डेक्सको सर्किट ब्रेकर प्रणालीमा पनि संशोधन गरिएको छ। नयाँ व्यवस्थाअनुसार कारोबार सुरु भएको पहिलो दुई घण्टाभित्र नेप्से परिसूचक ५ प्रतिशतले बढे वा घटेमा कारोबार १५ मिनेका लागि स्थगन गरिनेछ। यसअघि ४ प्रतिशत वा घटे वा बढेमा २० मिनेटसम्म बजार स्थगित गर्ने व्यवस्था थियो।

साथै ५ प्रतिशतको ब्रेकपछि बजार खुलेर नेप्से परिसूचक ८ प्रतिशतले घटे वा बढेमा उक्त दिनको लागि सम्पूर्ण कारोबार बन्द हुनेछ। यसअघि ६ प्रतिशतले बजार घटबढ भएमा बजार बन्द हुने व्यवस्था थियो।

यसै क्रममा, बजार खुल्नुअघि सञ्चालन हुने ‘प्री–ओपन सेसन’ (बिहान १०ः३० देखि १०ः४५ बजेसम्म) मा लागू हुने मूल्य सीमामा पनि परिवर्तन गरिएको छ। अब उक्त सेसनमा सेयरको मूल्य अधिकतम ५ प्रतिशतसम्म घटबढ गर्न पाइनेछ। यसअघि यो सीमा निकै न्यून थियो।