अरुण काबेलीलाई हकप्रद सेयर निष्कासन अनुमति, काबेली ‘ए’ आयोजना लगानी र ऋण तिर्ने

काठमाडौं। विद्युत नियमन आयोगले नेपाल स्टक एक्सचेन्ज (नेप्से) मा सूचिकृत अरुण काबेली पावर कम्पनी लिमिटेडलाई हकप्रद सेयर निष्कासन गर्न पूर्वस्वीकृती दिएको छ। आयोगले १ः०५ अनुपातमा एक अर्ब ९४ करोड ७९ लाख ७१ हजार रुपैयाँबराबर हकप्रद सेयर निष्कासन गर्न अरुण काबेली पावरलाई पूर्वस्वीकृती प्रदान गरेको हो।

आयोगको वैशाख ३ मा बसेको ३०७ औं वैठकले एक अर्ब रुपैयाँ सञ्चालनमा रहेको २५ मेगावाट क्षमताको काबेली बी–१ जलविद्युत आयोजना बनाउँदा लिएको ऋण तिर्न र बाँकी ९४ करोड ३७.६ मेगावाटको निर्माणाधीन काबेली ए आयोजनामा लगानी गर्न शर्तसहित स्वीकृति दिएको आयोगले जनाएको छ।

शर्तसहित हकप्रद सेयर निष्कासन गर्न पूर्वअनुमति दिएको आयोगका इन्जिनियर विशाल श्रेष्ठले जानकारी दिए। उनका अनुसार, प्रवद्र्धक कम्पनी काबेली इनर्जी लिमिटेडमा लगानी गर्ने प्रयोजनमा प्रयोग गरी १५ दिनभित्र पुष्टि हुने कागजातसहित आयोगमा जानकारी गराउनुपर्ने भएको छ।

अरुण काबेली पावरले काबेली इनर्जीको ७१ प्रतिशत सेयर खरिद गरेको छ। अरुण काबेलीले बुटबल पावर कम्पनी लिमिटेड (बीपीसी) बाट काबेली ए आयोजना खरिद गरेको हो।

बीपीसीबाट काबेली ‘ए’ आयोजना किन्दै अरुण काबेली पावर,सवा दुई अर्ब लगानी गर्नेे

काबेली ए आयोजना बीपीसीले स्थापना गरेको हो। पछिल्लो समय बीपीसी काबेली ए आयोजनाको सबै सेयर बेचेर बाहिरिन लागेको हो। बीपीसीको साधारणसभाले काबेली ए आयोजना र गुराँस इनर्जी लिमिटेडको स्वामित्वमा रहेको सबै सेयर अरुण काबेली पावरलाई बिक्री गरी कम्पनीबाट बाहिरिएको छ।

काबेली इनर्जीको चुक्ता पुँजी ७० करोड रूपैयाँ रहेको छ। बीपीसीको १९ लाख १४ हजार ६३५ कित्ता सेयर छ। त्यसैगरी, सहायक कम्पनी गुराँश इनर्जीको ५० लाख ८१ हजार १४७ कित्ता सेयर अरुण काबेली पावरले खरिद गरेको हो।

अरुण काबेली पावरले ७८ करोड रुपैयाँ स्वपुँजी (इक्विटी) प्रतिबद्धताको ३६ प्रतिशत लगानी गरिसकेको छ। काबेली ए आयोजनाको अनुमानित कुल लागत सात अर्ब ५२ करोड रुपैयाँ छ। ६० प्रतिशत बैंकको ऋण र बाँकी ४० प्रतिशत स्वपुँजी (इक्विटी) मिश्रण गरिएको छ।

बीपीसीले हिमाल पावरको स्वामित्व किनेर काबेली इनर्जीको बेच्ने, नर्वेजियन कम्पनी नेपालबाट बाहिरिँदै

अरुण काबेली पावरले पहिले इक्विटी रकमको ४० प्रतिशत अर्थात एक अर्ब २० करोड रुपैयाँ लगानी गर्ने प्रतिबद्धता जनाएको थियो। पछि कम्पनीले आफ्नो इक्विटी प्रतिबद्धतालाई ७१ प्रतिशत पुर्याएको छ। इक्विटी थप भएपछि लगानी बढाएर दुई अर्ब १५ करोड रुपैयाँ पुरयाउने योजना बनाएको छ।

चालू आर्थिक वर्षको छ महिनामा अरुण काबेली पावरले १५ करोड ४४ लाख रुपैयाँ खुदनाफा गरेको छ। यसबीचमा कम्पनीले बिजुली बेचेर ३८ करोड ३५ लाख रुपैयाँ आम्दानी गरेको छ।

गत आर्थिक वर्षमा अरुण काबेलीले बिजुली बेचेर ६३ करोड २२ लाख रुपैयाँ आम्दानी गरेको थियो। गत वर्ष कम्पनीले १७ करोड रुपैयाँ खुदनाफा गरेको थियो।