सेबोन अध्यक्षका लागि चार जना अन्तर्वार्ताका लागि छनोट, कसले मार्ला बाजी?

काठमाडौं। नेपाल धितोपत्र बोर्ड (सेबोन) को अध्यक्ष नियुक्तिका लागि चार जनाको नाम अन्तिम छनोटमा परेको छ। सिफारिस समितिले मंगलबार नाम सार्वजनिक गर्दै उनीहरूलाई अन्तर्वार्ताका लागि बोलाएको हो।

राष्ट्रिय योजना आयोगका सदस्य डा. सञ्जय आचार्य नेतृत्वको समितिले डा. नवराज अधिकारी, विनयदेव आचार्य, मुकुन्दकुमार क्षेत्री र डा. गोपालप्रसाद भट्टलाई छनोट गरेको छ। उनीहरूको अन्तर्वार्ता जेठ ८ गते हुने तय गरिएको छ।

अध्यक्ष पदका लागि कुल ४७ जनाले आवेदन दिएका थिए। छनोटमा परेका डा. अधिकारी सेबोनका पूर्वकार्यकारी निर्देशक हुन् भने उनले हालै मात्र अवकाश पाएका थिए। विनयदेव आचार्य हाल सेबोनकै कार्यकारी निर्देशकका रूपमा कार्यरत छन्।

त्यसैगरी मुकुन्द कुमार र डा. भट्ट नेपाल राष्ट्र बैंकका पूर्वकार्यकारी निर्देशक हुन्। क्षत्रीले राष्ट्र बैंकको प्रतिनिधित्व गर्दै सेबोन सञ्चालक समितिमा समेत काम गरिसकेका छन्।

यसअघि भट्टले आवेदन दिएपछि उनका दाजु पर्ने डा. गुणाकर भट्टले सिफारिस समितिको अध्यक्ष पदबाट राजीनामा दिएका थिए। त्यसपछि सरकारले डा. आचार्यलाई समितिको संयोजक बनाएको थियो।

सेबोनका तत्कालीन अध्यक्ष सन्तोषनारायण श्रेष्ठले वैशाख ४ गते राजीनामा दिएपछि मन्त्रिपरिषद्ले वैशाख ८ गते नयाँ अध्यक्ष छनोटका लागि तीन सदस्यीय सिफारिस समिति गठन गरेको थियो।