भारतमा बिजुलीको माग बढेर नयाँ रेकर्ड, विद्युत प्राधिकरणले निर्यात गर्यो ४९२ मेगावाट

काठमाडौं। गर्मी अचाक्ली बढेपछि छिमेकी भारतमा बिजुलीको मागमा नयाँ रेकर्ड कायम भएको छ। बिहीबार भारतमा बिजुलीको माग बढेर दुई लाख ७१ हजार मेगावाट (२७१ गिगावाट) पुगेको छ।

बिजुलीको माग एकै दिन पाँच हजार मेगावाट (पाँच गिगावाट) बढेको त्यहाँको ऊर्जा मन्त्रालयले जनाएको छ।

मन्त्रालयले सोलार समयमा बिजुलीको माग दुई लाख ७० हजार मेगावाट माथि पुगेको सामाजिक सञ्जाल एक्समार्फत जानकारी दिएको छ। बुधबार ऊर्जाको माग दुई लाख ६५ हजार मेगावाट थियो।

ऊर्जा उत्पादनमा थर्मल प्लान्टको हिस्सा ठूलो रहेको छ। कूल मागको ६२.८ प्रतिशत योगदान थर्मल प्लान्टको छ। यस्तै २२ प्रतिशत सोलार, ५.८ प्रतिशत जलविद्युत र पाँच प्रतिशत वायु ऊर्जाबाट ऊर्जा आपूर्ति भएको मन्त्रालयले जनाएको छ।

थर्मल पावर प्लान्टहरूमा कोइलाको उपलब्धता पर्याप्त रहेको र कोइला आपूर्तिहरूको प्रभावकारी रूपमा अनुगमन भइरहेको मन्त्रालयले एक्समार्फत जानकारी दिएको छ।

हरितगृह ग्यासको तेस्रो ठूलो उत्सर्जनकर्ता भारतले २०७० सम्ममा शून्य उत्सर्जनमा पुग्ने प्रतिबद्धता जनाएको छ। तर, भारतको ऊर्जा प्रणाली कोइलामा धेरै निर्भर छ।

भारतीय मौसम विज्ञान विभागले उत्तर प्रदेश राज्यको बांदा शहरमा ४७.६ डिग्री तापक्रम मापन गरेको छ। जुन राजधानी नयाँ दिल्लीबाट ४५० किलोमिटर दक्षिणपूर्वमा रहेको छ।

सौर्य घण्टामा हप्तामा अहिलेसम्मको उच्चतम माग कुनै पनि अवरोध बिना पूरा भएको छ।

गर्मी बढेपछि बिजुलीको माग बढेर नयाँ कीर्तिमानी कायम गरेको हो। भारतीयहरुले दिन र रातमा चर्को गर्मीबाट बच्न पंखा र एयर कन्डिसनलगायत चिसो बनाउन अन्य विद्युतीय उपकरणहरु प्रयोग बढाएपछि बिजुलीको माग बढेर नयाँ रेकर्ड कायम भएको हो।

आगामी जुनमा बिजुलीको खपत बढेर दुई लाख ८५ हजार मेगावाट पुग्ने अनुमान गरिएको द इकानोमिक टाइम्सले जनाएको छ।

बिहीबार चौथो दिन लगातार बिजुलीको माग सौर्य घण्टामा अहिलेसम्मकै उच्च पुगेको मन्त्रालयले एक विज्ञप्तिमा भनेको छ।

ऊर्जा मन्त्रालयले बिहीबारको सोलार समयको उच्च माग र शुक्रबारको उच्च मागको प्रवृत्तिलाई हेरेर अनुमानहरू पुनः क्यालिब्रेट गर्न आवश्यक छ कि छैन भनेर हेर्ने जनाएको छ।

विश्वको सबैभन्दा बढी जनसंख्या भएको देश भारतको धेरै भागमा तीव्र तातोको लहर चलिरहेको बेला भारतका ऊर्जा उत्पादकहरूले विद्युत उत्पादनको रेकर्ड कायम गरेको ऊर्जा मन्त्रालयले जनाएको छ।

नेपालमा २७२७ मेगावाट माग

छिमेकी भारतमा लाखौं मेगावाट बिजुलीको माग हुँदा नेपालमा भने केही हजार मेगावाट मात्र रहेको छ। बिजुलीको खपत बढेर २७ सय २७ मेगावाट पुगेको नेपाल विद्युत प्राधिकरणले जनाएको छ।

प्राधिकरणले हाल चार सय ९२ मेगावाट बिजुली भारत निर्यात गरेको छ भने १४२ मेगावाट भारतबाट आयात गरेको जनाएको छ।

गत वर्ष नेपालले भारतमा ११ सय मेगावाट बढी बिजुली भारतमा निर्यात गरेको थियो। नेपाल र भारतबीच १० हजार मेगावाट बिजुली किन्ने सम्झौता भइसकेको छ।