सभापति आफ्नै ढंगले भारत भ्रमणमा जाँदै हुनुहुन्छ, प्रधानमन्त्रीको सम्बन्ध छैन: पोखरेल

काठमाडौँ: सरकारका प्रवक्ता तथा शिक्षामन्त्री सस्मित पोखरेलले राष्ट्रिय स्वतन्त्र पार्टी (रास्वपा)का सभापति रवि लामिछानेको भारत भ्रमणसँग प्रधानमन्त्री वालेन्द्र शाहको कुनै सम्बन्ध नभएको बताएका छन्। सोमबार मन्त्रिपरिषद्का निर्णय सार्वजनिक गर्ने क्रममा सञ्चारकर्मीले सोधेका प्रश्नको उत्तर दिँदै उनले प्रधानमन्त्रीको भारतसहित अन्य देशको भ्रमण जाने समय आउने बताए।

प्रधानमन्त्रीज्यूको भारत जाने समय अथवा जुनसुकै देश जाने समय जतिखेर आउँछ त्यसवेला जाने उनले बताए। उनले भने, ‘उहाँ भारत मात्र नजानुभएको होइन अहिले विदेश कतै पनि गइराख्नुभएको छैन। अहिले हाम्रो पहिलो १०० दिनको कार्यव्यस्तता एकदमै धेरै छ। सुरुमा काममा अलिकति बढी हामी सबैजना फोकस्ड पनि छौँ।’

प्रधानमन्त्री भएयता शाहले संसद्‌देखि सार्वजनिक कार्यक्रममा सम्बोधन गरेका छैनन्। उनको हालसम्म कुनै विदेश भ्रमण पनि निर्धारित भएको छैन।

यद्यवि सभापति लामिछाने भने भारत भ्रमणमा जाँदैछन्। यसबारे प्रष्ट्याउँदै प्रवक्ता पोखरेलले भने, ‘अहिले सभापतिज्यू (रवि लामिछाने) आफ्नै ढंगले अब जाँदै हुनुहुन्छ। प्रधानमन्त्रीज्यूको त्यससँग केही पनि सम्बन्ध छैन।’

यस्तै उनले गणतन्त्र दिवसमा प्रधानमन्त्रीले सम्बोधन नगर्ने विषयबारे पनि स्पष्ट पारेका छन्। उनले भने, ‘त्यसको बारेमा आज मन्त्रिपरिषद्‌मा छलफल भएको छैन। आवश्यकता अनुसार प्रधानमन्त्रीज्यूले सम्बोधन गर्नुपर्ने ठाउँमा गर्नुहुन्छ।’