टस जितेर नेपालले रोज्यो बलिङ

काठमाडौं – आइसीसी क्रिकेट एकदिवसीय विश्वकपअन्तर्गत ग्लोबल छनोटको दोस्रो खेलमा अमेरिकाविरुद्ध नेपालले पहिला बलिङ गर्ने भएको छ। नेपाली टिमका कप्ताने रोहित कुमार पौडेलले जिम्बावेको टागासिंगा स्पोर्टस् क्लबमा टस जितेर पहिले बलिङ रोजेका हुन्।

नेपालले पहिलो खेलमा जिम्बावेविरुद्ध टस हारेर पहिले ब्याटिङ गरेको थियो। सो खेलमा नेपाल आठ विकेटले पराजित भएको थियो। दोस्रो खेलमा भने टस जितेर बलिङ राजेको हो। आजको खेलमा नेपाल अमेरिकालाई हराएर प्रतियोगितामा पहिलो जित हात पार्न चाहन्छ।

यता पहिलो खेलमा अमेरिकाले वेस्ट इन्डिजसँग ३९ रनको हार बेहोरेको थियो। त्यसैले आज दुवै टोली पहिलो जितको खोजीमा रहनेछन्।

समूह बीमा रहेका यि दुवै टिमलाई अर्को चरणमा पुग्नको लागि आजको जित धेरै आवश्यक छन्। समूहका बाँकी टिम निकै बलिया रहेको कारण आजको खेलमा जित निकाल्ने टिमलाई सुपर सिक्समा पुग्ने अवसर रहनेछ। समूह बीमा सहभागी पाँच टिममध्ये नेपालले पहिलो खेलमा आयोजक टिमसँग हार बेहोरिसकेको हो। अब वेस्ट इन्डिजविरुद्ध जित निकाल्ने सम्भावना पनि कम छ। त्यसैले नेपाल अमेरिका र नेदरल्यान्ड्सविरुद्ध जित निकालेर समूहको तेस्रो स्थानमा रहँदै सुपर सिक्समा उक्लन चहान्छ।

त्यसका लागि आजको जित आवश्यक छ। तर अमेरिका कम बलियो टिम भने होइन्। अहिलेसम्म ६ पटक खेल्दा अमेरिकाले दुई पटक जित निकालिसकेको छ। यि दुईबीचको खेलमा नेपालले तीन जित निकाल्दा एक खेल भने टाई भएको थियो।

त्रिवी मैदानमै भएको एक खेलमा अमेरिका नेपालसँग ३५ रनमा समेटिएको थियो। त्यो विश्वकै कम योगफलमा पर्छ। तर यसबाहेकका सबै खेल प्रतिस्पर्धात्मक भएका छन्। त्यसैले आजको खेल पनि निकै प्रतिस्पर्धात्मक हुने आशा गरिएको छ। यसअघिको खेलमा अमेरिकाले वेस्ट इन्डिजसँग ३९ रनको हार बेहोरेको थियो।