समस्याग्रस्त सहकारीका सञ्चालकको नाम सार्वजनिक, लुकाइएको सम्पत्तिबारे सूचना माग

काठमाडौँः समस्याग्रस्त सहकारी व्यवस्थापन समितिले समस्याग्रस्त घोषित २३ सहकारी संस्थाका सञ्चालकहरूको विवरण सार्वजनिक गर्दै उनीहरूले लुकाएको हुन सक्ने सम्पत्तिबारे जानकारी दिन सर्वसाधारणसँग आग्रह गरेको छ।

समितिले सार्वजनिक सूचनामार्फत सहकारीको बचत रकम वा सम्पत्ति हिनामिना गरी परिवार, आफन्त, नातागोता वा अन्य व्यक्तिको नाममा सम्पत्ति लुकाइएको जानकारी भए कार्यालयमा सूचना उपलब्ध गराउन अनुरोध गरेको हो।

समितिका अनुसार समस्याग्रस्त सहकारीका सञ्चालकहरूले संस्थाको दायित्व व्यवस्थापन, ऋण असुली, सम्पत्ति पहिचान तथा अन्य स्रोत–साधनको खोजीमा सहयोग गर्नुपर्ने दायित्व रहन्छ। साथै बचतकर्ताको रकम फिर्ता, दायित्व फरफारक र नियामकीय प्रक्रियामा नियमित रूपमा समितिसँग समन्वय गर्न पनि आग्रह गरिएको छ।

समितिले सार्वजनिक गरेको सूचनामा सहकारीका सञ्चालक तथा पदाधिकारीहरूले आवश्यक सहयोग नगरे कानुनबमोजिम कारबाही प्रक्रिया अघि बढाइने चेतावनी समेत दिएको छ।

यस्तै, सार्वजनिक गरिएको विवरणमा कुनै त्रुटि, फरक सूचना वा अद्यावधिक गर्नुपर्ने अवस्था भए सम्बन्धित व्यक्तिलाई समितिको कार्यालयमा सम्पर्क गर्न आग्रह गरिएको छ।

पछिल्लो समय समस्याग्रस्त सहकारी संस्थाहरूमा बचतकर्ताको रकम फिर्ता गराउने, हिनामिना भएको सम्पत्ति खोजी गर्ने तथा वास्तविक सम्पत्ति पहिचान गरी दायित्व व्यवस्थापन गर्ने उद्देश्यले समितिले निगरानी र अनुसन्धान प्रक्रिया तीव्र बनाएको छ।