नेपाल भित्रिँदै जीडब्लूएमको अत्याधुनिक नयाँ विद्युतीय एसयूभी

काठमाडौँ: विश्व अटोमोबाइल उद्योगमा स्थापित ब्रान्ड जीडब्लूएम (ग्रेट वाल मोटर्स) ले नेपाली बजारका लागि नयाँ पुस्ताको अत्याधुनिक विद्युतीय एसयूभी ल्याउने तयारी गरेको छ। विश्वका १७० भन्दा बढी देश तथा क्षेत्रमा आफ्नो उपस्थिति विस्तार गरिसकेको जीडब्लूएमले नेपालमा पनि उन्नत प्रविधियुक्त विद्युतीय सवारीसाधनमार्फत आफ्नो उपस्थितिलाई थप बलियो बनाउने संकेत दिएको हो।

कम्पनीले हालसम्म मोडलको औपचारिक घोषणा नगरे पनि सार्वजनिक भएका प्रारम्भिक विवरणअनुसार नयाँ एसयूभीमा करिब ५२० किलोमिटरसम्मको ड्राइभिङ रेन्ज उपलब्ध हुनेछ।

गाडीमा ३६० डिग्री सराउन्ड भ्यु क्यामेरा, ब्लाइन्ड स्पट मनिटरिङ, १८० डिग्री ट्रान्सपरेन्ट च्यासिस भ्यु टेक्नोलोजी तथा ७ वटा एयरब्यागजस्ता उन्नत सुरक्षा सुविधाहरू समावेश हुनेछन्। साथै उद्योगकै अग्रणी एईबी र एमईबी सुरक्षा प्रणाली तथा २० भन्दा बढी एड्भान्स्ड ड्राइभर असिस्टेन्स सिस्टम सुविधाले यात्रालाई अझ सुरक्षित बनाउने कम्पनीको दाबी छ।

नयाँ एसयूभीमा स्मार्ट ककपिट, कफी ओएस ३.० एआई सिस्टम, वन–टच कन्ट्रोल, भेन्टिलेसन सुविधासहितको ६–तरिकाले विद्युतीय रूपमा समायोजन गर्न मिल्ने प्रिमियम चालक सिट तथा पाँच तहको ब्याट्री सुरक्षा प्रणाली रहने जनाइएको छ। सहरदेखि राजमार्गसम्म सहज ड्राइभिङका लागि चारवटा स्मार्ट ड्राइभिङ मोड पनि उपलब्ध हुनेछन्।

आकर्षक डिजाइन, प्रिमियम बाह्य संरचना र आधुनिक प्रविधिको संयोजन रहेको यो विद्युतीय एसयूभीले नेपाली बजारमा नयाँ मापदण्ड स्थापित गर्ने अपेक्षा गरिएको छ। कम्पनीले गाडीसम्बन्धी विस्तृत जानकारी तथा औपचारिक घोषणा निकट भविष्यमा सार्वजनिक गर्ने जनाएको छ।