सिटिजन्स बैंकका कर्पोरेट ग्राहकले अब एउटै प्लेटफर्मबाट सबै बैंकिङ सेवा लिन सक्ने

काठमाडौँः सिटिजन्स बैंक इन्टरनेशनल लिमिटेडका कर्पोरेट ग्राहकहरूले अब खाताको मौज्दात (ब्यालेन्स) हेर्न, स्टेटमेन्ट डाउनलोड गर्न, रकम स्थानान्तरण (फण्ड ट्रान्सफर) गर्न, ईएमआई भुक्तानी गर्न तथा तलब वितरण गर्न छुट्टाछुट्टै प्लेटफर्म प्रयोग गर्नुपर्ने झन्झटबाट मुक्ति पाउने भएका छन्।

यसका लागि एपीआई बैंकिङ प्लेटफर्म ‘¥यापिड’ र सिटिजन्स बैंक इन्टरनेशनल लिमिटेडबीच सहकार्य भएको छ। उक्त सहकार्यसँगै सिटिजन्स बैंकको प्रणालीमा ‘¥यापिड’ एकीकृत गरिएको छ।

अब बैंकका कर्पोरेट ग्राहकहरूले आफ्नै सफ्टवेयर वा ईआरपी प्रणालीमार्फत एउटै प्लेटफर्म प्रयोग गरी विभिन्न बैंकिङ सेवा सञ्चालन गर्न सक्नेछन्। प्रयोगकर्ताले ‘कनेक्ट विथ एपीआई बैंकिङ’ विकल्पमार्फत आफ्नो बैंक खाता लिंक गर्न सक्ने व्यवस्था गरिएको छ।

गोक्यो ल्याब्सका बिजनेस प्रमुख अशितोष साहका अनुसार यस सहकार्यले सिटिजन्स बैंकका कर्पोरेट ग्राहकहरूको सेवा प्रवाहमा महत्वपूर्ण रूपान्तरण ल्याउनेछ। वित्तीय कार्यलाई डिजिटल रूपमा एकीकृत गर्दै व्यवसायहरूको समय, लागत तथा सञ्चालनसम्बन्धी जटिलता उल्लेखनीय रूपमा घट्ने उनको भनाइ छ।

बैंकका अनुसार कर्पोरेट ग्राहकहरूले सेवा प्रयोग गर्न प्रारम्भमा मोबाइल बैंकिङजस्तै एक पटक मात्र फाराम भर्नुपर्नेछ। त्यसपछि अधिकांश बैंकिङ सेवा अनलाइनमार्फत सञ्चालन गर्न सकिनेछ।

‘¥यापिड’ले ग्राहकको अनुमति (कन्सेन्ट) प्रक्रियालाई समेत डिजिटल बनाएको छ, जसले सेवा थप सहज, छरितो र पारदर्शी बनाउने विश्वास गरिएको छ। सुरक्षाका दृष्टिले प्लेटफर्ममा एन्ड–टु–एन्ड इन्क्रिप्सन, बहु–स्तरीय प्रमाणीकरण (मल्टिलेयर भेरिफिकेसन) तथा अत्याधुनिक सुरक्षा प्रोटोकल प्रयोग गरिएको कम्पनीले जनाएको छ। यसले डिजिटल कारोबारलाई सुरक्षित र भरपर्दो बनाउने दाबी गरिएको छ।

‘¥यापिड’ एक एपीआई–आधारित बैंकिङ प्लेटफर्म हो, जसले ‘बैंकिङ एज अ सर्भिस’ मोडलमार्फत बैंक, फिनटेक तथा डिजिटल सेवा प्रदायकहरूलाई जोड्ने काम गर्छ। कम्पनीका अनुसार एपीआई बैंकिङ अवधारणालाई सहज र पहुँचयोग्य बनाउँदै साना, मझौला तथा ठूला व्यवसायलाई समान रूपमा डिजिटल बैंकिङ सुविधा उपलब्ध गराउने लक्ष्य राखिएको छ।