बिना धितो १० लाख रुपैयाँसम्म कर्जा पाइने, क–कसले कसरी लिनसक्छन् ऋण?

काठमाडौँ: नेपाल राष्ट्र बैंकले डिजिटल लेन्डिङको दायरा विस्तार गर्दै लघु, साना तथा मझौला व्यवसायीलाई मोबाइल बैंकिङमार्फत धितोबिनै १० लाख रुपैयाँसम्म कर्जा लिन सक्ने व्यवस्था गरेको छ।

‘विद्युतीय माध्यमबाट प्रवाह हुने कर्जा (डिजिटल लेन्डिङ) सम्बन्धी मार्गदर्शन, २०७८’ संशोधन गर्दै राष्ट्र बैंकले अल्पकालीन चालू पूँजी कर्जाका लागि ५ लाख रुपैयाँ र दीर्घकालीन चालू पूँजी कर्जाका लागि १० लाख रुपैयाँसम्म डिजिटल कर्जा उपलब्ध गराउने व्यवस्था गरेको हो।

संशोधित व्यवस्थाअनुसार ग्राहकले मोबाइल बैंकिङबाट आवेदन दिएपछि स्वचालित प्रणालीमार्फत मूल्यांकन भई केही मिनेटमै कर्जा खातामा जम्मा हुनेछ। यसका लागि धितो, शाखा भ्रमण वा कागजी प्रक्रिया आवश्यक पर्दैन।

जुन व्यक्तिको बैंक खातामा नियमित रूपमा तलब वा व्यावसायिक आम्दानी जम्मा हुन्छ, उनीहरूले अधिकतम ५ लाख रुपैयाँसम्म डिजिटल कर्जा पाउनेछन्। यस्तो कर्जाको भुक्तानी अवधि अधिकतम ३ वर्ष रहनेछ। अन्य प्राकृतिक व्यक्ति (साधारण ग्राहक) ले अधिकतम २ लाख रुपैयाँसम्म ऋण पाउनेछन्। यसको अवधि पनि ३ वर्ष नै तोकिएको छ।

लघु, साना तथा मझौला व्यवसायीहरूले आफ्नो व्यवसायका लागि ‘अल्पकालीन चालू पुँजी कर्जा’ का रूपमा अधिकतम ५ लाख रुपैयाँसम्म ऋण पाउनेछन्। यसको भुक्तानी अवधि १ वर्ष रहनेछ।

व्यवसायीहरूले दीर्घकालीन प्रयोजनका लागि अधिकतम १० लाख रुपैयाँसम्म डिजिटल कर्जा प्राप्त गर्न सक्नेछन्। यसको भुक्तानी अवधिको हकमा सम्बन्धित बैंक तथा वित्तीय संस्थाले आफ्नो चालू पुँजी कर्जा नीति बमोजिम तय गर्न सक्नेछन्।

राष्ट्र बैंकले यो व्यवस्थाले डिजिटल कारोबार गर्ने लघु तथा साना व्यवसायीको वित्तीय पहुँच विस्तार गर्न सहयोग पुग्ने जनाएको छ।