बेलायत सरकार र विश्व बैंकको सहयोगमा नेपालमा हरित हाइड्रोजन पाइलट परियोजना सुरु

प्युठान: बुटवल पावर कम्पनी (बीपीसी) ले प्यूठानको दरिमचौरस्थित झिमरुक जलविद्युत् आयोजनामा ५० किलोवाट क्षमताको हरित हाइड्रोजन पाइलट परियोजना सञ्चालनमा ल्याएको छ।

बेलायत सरकारको विदेश, राष्ट्रमण्डल तथा विकास कार्यालयको आर्थिक सहयोग र विश्व बैंकको प्राविधिक सहयोगमा स्थापित उक्त परियोजनाले नवीकरणीय जलविद्युत् प्रयोग गरी विद्युत् अपघटन (इलेक्ट्रोलाइसिस) प्रक्रियाबाट हरित हाइड्रोजन उत्पादन गर्नेछ।

परियोजनामा जडान गरिएको ५० किलोवाट क्षमताको क्षारीय इलेक्ट्रोलाइजरले ९९.९९ प्रतिशत शुद्धताको हाइड्रोजन उत्पादन गर्छ। उत्पादित हाइड्रोजनलाई १५० बार दबाबमा सिलिण्डरमा भण्डारण गरी विभिन्न सम्भावित प्रयोगका लागि परीक्षण गरिने जनाइएको छ।

बीपीसीका अनुसार यो प्लान्ट १३ अप्रिल २०२६ मा सफलतापूर्वक सञ्चालनमा आएको थियो र सोही दिन पहिलो हाइड्रोजन सिलिण्डर भरिएको थियो।

हरित हाइड्रोजनलाई स्वच्छ ऊर्जा प्रणालीतर्फको संक्रमणमा महत्वपूर्ण ऊर्जा वाहकका रूपमा हेरिन्छ। यसलाई यातायात, उद्योग, मल उत्पादन तथा दीर्घकालीन ऊर्जा भण्डारणजस्ता क्षेत्रमा प्रयोग गर्न सकिने सम्भावना रहेको छ।

बीपीसीले पाइलट परियोजनाबाट उत्पादन, भण्डारण, सुरक्षा, प्राविधिक कार्यसम्पादन तथा आर्थिक व्यवहार्यतासम्बन्धी अनुभव र तथ्याङ्क प्राप्त हुने जनाएको छ। कम्पनीका अनुसार यसबाट प्राप्त सिकाइले भविष्यमा हरित हाइड्रोजनको व्यावसायिक विकास तथा नीतिगत निर्णयमा सहयोग पुग्ने अपेक्षा गरिएको छ।