वाणिज्य बैंकहरूको नाफा १८ प्रतिशत बढेर साढे ५६ अर्ब, कुन बैंकको कति?

काठमाडौं। चालू आर्थिक वर्ष २०८२/०८३ को वैशाख मसान्तसम्म वाणिज्य बैंकहरूको नाफामा उल्लेख्य सुधार देखिएको छ।

नेपाल राष्ट्र बैंकले सार्वजनिक गरेको मासिक तथ्यांक अनुसार सञ्चालनमा रहेका २० वटा वाणिज्य बैंकहरूले १० महिनाको अवधिमा कुल ५६ अर्ब ४७ करोड ५० लाख रुपैयाँ खुद नाफा आर्जन गरेका छन्।

यो रकम गत आर्थिक वर्षको सोही अवधिको तुलनामा करिब १८.१६ प्रतिशतले बढी हो। अघिल्लो आर्थिक वर्षको वैशाख मसान्तसम्म वाणिज्य बैंकहरूले कुल ४७ अर्ब ७९ करोड ५० लाख रुपैयाँ नाफा कमाएका थिए।

नबिल बैंकको अग्रता कायम

नाफाको आधारमा नबिल बैंक पुनः शीर्ष स्थानमा रहेको छ। वैशाख मसान्तसम्म बैंकले सात अर्ब ६६ करोड ९६ लाख रुपैयाँ खुद नाफा कमाएको छ। चालू आर्थिक वर्षमा सात अर्ब रुपैयाँभन्दा बढी नाफा कमाउने नबिल एकमात्र वाणिज्य बैंक बनेको छ। चालू आर्थिक वर्षमा नबिलले साढे आठ अर्ब रुपैयाँ हारहारीमा नाफा गर्ने देखिएको छ।

दोस्रो स्थानमा रहेको ग्लोबल आइएमई बैंक ले पाँच अर्ब १९ करोड १० लाख रुपैयाँ नाफा आर्जन गरेको छ। त्यस्तै कुमारी बैंक चार अर्ब ४९ करोड ६९ लाख रुपैयाँ खुद नाफासहित तेस्रो स्थानमा रहेको छ। नेपाल इन्भेस्टमेन्ट मेगा बैंकले तीन अर्ब ८० करोड ३२ लाख रुपैयाँ नाफा कमाउँदै चौथो स्थान हासिल गरेको छ।

त्यसैगरी एभरेष्ट बैंकले तीन अर्ब ७० करोड १२ लाख, प्राइम कमर्सियल बैंकले तीन अर्ब ४० करोड ६१ लाख र सरकार स्वामित्वको राष्ट्रिय वाणिज्य बैंकले तीन अर्ब २१ करोड ५७ लाख रुपैयाँ खुद नाफा कमाएका छन्। साथै, एनएमबी बैंकको नाफा तीन अर्ब १४ करोड ८७ लाख रुपैयाँ पुगेको छ।

त्यस्तै, नेपाल बैंकले दुई अर्ब ९८ करोड ८० लाख, सानिमा बैंकले दुई अर्ब ६८ करोड ७१ लाख, लक्ष्मी सनराइज बैंकले दुई अर्ब ४६ करोड १६ लाख, सिद्धार्थ बैंकले दुई अर्ब ३८ करोड ८९ लाख, स्ट्यान्डर्ड चार्टर्ड बैंकले दुई अर्ब ३५ करोड ६२ लाख रुपैयाँ खुद नाफा आर्जन गरेका छन्।

माछापुच्छ्रे बैंकले एक अर्ब ८८ करोड ११ लाख, नेपाल एसबिआई बैंकले एक अर्ब ६८ करोड र कृषि विकास बैंकले एक अर्ब ५९ करोड ६९ लाख रुपैयाँ नाफा कमाएका छन्।

त्यस्तै सिटिजन्स बैंकको नाफा एक अर्ब ४९ करोड ९० लाख र प्रभु बैंकको नाफा एक अर्ब १६ करोड ६७ लाख रुपैयाँ रहेको छ।

नाफाको हिसाबले सबैभन्दा पछाडि रहेका हिमालयन बैंकले ८० करोड २८ लाख र एनआईसी एशिया बैंकले ३३ करोड २९ लाख रुपैयाँ मात्र खुद नाफा गरेका छन्।