विकास बैंकहरूको नाफा ४४ प्रतिशत बढ्यो, गरिमा र मुक्तिनाथको नाफा अर्बमाथि

काठमाडौँः चालू आर्थिक वर्षको १० महिना (साउनदेखि वैशाखसम्म) मा विकास बैंक क्षेत्रको समग्र वित्तीय अवस्था मजबुत बन्दै गएको देखिएको छ। नेपाल राष्ट्र बैंकले सार्वजनिक गरेको तथ्यांकअनुसार १७ वटा विकास बैंकहरूले वैशाख मसान्तसम्म कुल ६ अर्ब ६२ करोड ६८ लाख रुपैयाँ खुद नाफा आर्जन गरेका छन्।

यो नाफा अघिल्लो आर्थिक वर्षको सोही अवधिको तुलनामा ४४.१५ प्रतिशतले बढी हो। गत वर्ष यही अवधिसम्म विकास बैंकहरूको संयुक्त नाफा ४ अर्ब ५९ करोड ७८ लाख रुपैयाँमा सीमित थियो।

१७ विकास बैंकमध्ये १३ बैंकले नाफा कमाएका छन् भने ४ बैंक अझै घाटामा छन्। नाफा आर्जन गर्ने बैंकहरूमध्ये अधिकांशले गत वर्षको तुलनामा उल्लेखनीय वृद्धिदर हासिल गरेका छन्।

वैशाखसम्मको तथ्यांकअनुसार सबैभन्दा धेरै नाफा कमाउने विकास बैंकको सूचीमा गरिमा विकास बैंक अग्रस्थानमा रहेको छ। गरिमा बैंकले १ अर्ब २० करोड ७९ लाख रुपैयाँ नाफा कमाएको छ। मुक्तिनाथ विकास बैंकले १ अर्ब १० करोड ६३ लाख रुपैयाँ नाफा कमाउँदै दोस्रो स्थान सुरक्षित गरेको छ।

गत वर्षको तुलनामा गरिमाको नाफा करिब ३९ प्रतिशत तथा मुक्तिनाथको नाफा २६ प्रतिशतभन्दा बढीले बढेको देखिन्छ।

त्यस्तै, शाइन रेसुङ्गा डेभलपमेन्ट बैंकले ८९ करोड ३९ लाख, ज्योति विकास बैंकले ७२ करोड ४९ लाख, कामना सेवा विकास बैंकले ६७ करोड २ लाख, लुम्बिनी विकास बैंकले ६३ करोढ ६ लाख, सांग्रिला डेभलपमेन्ट बैंकले ५४ करोड ६० लाख, महालक्ष्मी विकास बैंकले ४६ करोड ३८ लाख रुपैयाँ नाफा गरेका छन्।

एक्सेल डेभलपमेन्ट बैंकले १४ करोड ६३ लाख, मितेरी डेभलपमेन्ट बैंकले १० करोड ३५ लाख, सप्तकोशी डेभलपमेन्ट बैंकले ५ करोड ८६ लाख, ग्रीन डेभलपमेन्ट बैंकले ४ करोड ५५ लाख र कर्पोरेट डेभलपमेन्ट बैंकले २ करोड ८७ लाख रुपैयाँ खुदनाफा कमाएको छ ।

सो अवधिसम्म ४ बैंक भने घाटामा छन्। कर्णाली डेभलपमेन्ट बैंक २३ करोड ९६ लाख, नारायणी डेभलपमेन्ट बैंकको ५ करोड ४९ लाख, सिन्धु विकास बैकको ३ करोड ७२ लाख र सालपा विकास विकास बैंकले ८० लाख रुपैयाँ घाटा ब्यहोरेका छन्। समस्याग्रस्त कर्णाली डेभलपमेन्टलाई नेपाल राष्ट्र बैंकले नियन्त्रणमा लिएको छ। सञ्चालनको तयारी भइरहेको छ।

गत आर्थिक वर्षको तुलनामा सर्वाधिक नाफा ग्रोथ गर्नेमा लुम्बिनी विकास बैंक रहेको छ। यो बैंकले ४२८.७० प्रतिशतले नाफा बढाएको सार्वजनिक गरेको वित्तीय विवरणमा उल्लेख छ।