नेप्सेमा सामान्य सुधार, कारोबार रकम भने खुम्चियो

काठमाडौँ: लगातार दुई कारोबार दिन ओरालो लागेको सेयर बजार बुधबार सामान्य सुधारतर्फ फर्किएको छ। नेपाल स्टक एक्सचेञ्ज (नेप्से) सूचक अत्यन्तै सानो वृद्धिसहित २ हजार ७०५.५३ विन्दुमा पुगेर बन्द भएको हो।

यद्यपि बजारमा लगानीकर्ताको कारोबार सक्रियता भने अघिल्लो दिनको तुलनामा कमजोर देखिएको छ। यस दिन ३ अर्ब ६३ करोड ७५ लाख रुपैयाँभन्दा बढी मूल्यका ८३ लाख ७५ हजार कित्ता सेयर किनबेच भएका छन्। अघिल्लो कारोबार दिनको तुलनामा कारोबार रकम र सेयर संख्या दुवै घटेका हुन्।

क्षेत्रगत प्रदर्शनतर्फ विकास बैंक, फाइनान्स, जलविद्युत् तथा उत्पादन–प्रशोधन समूहले सकारात्मक नतिजा देखाए। अन्य अधिकांश समूह भने दबाबमा रहे।

आजको कारोबारमा १२६ कम्पनीका सेयरधनीले लाभ कमाउँदा १३१ कम्पनीको मूल्यमा गिरावट आएको छ। १४ कम्पनीको सेयर मूल्यमा कुनै परिवर्तन भएन।

व्यक्तिगत कम्पनीतर्फ सोपान फार्मास्युटिकल्स र अपोलो हाइड्रोपावर सबैभन्दा बढी चम्किएका छन्। दुवै कम्पनीको सेयर मूल्य करिब १५ प्रतिशतले उकालो लागेको छ।