आरजुलाई अख्तियारको पत्र: ३ दिनभित्र बयानमा आउनू, नआए कानुन बमोजिम हुनेछ

काठमाडौँ: अख्तियार दुरुपयोग अनुसन्धान आयोगले पूर्वप्रधानमन्त्री शेरबहादुर देउवाकी पत्नी तथा पूर्व परराष्ट्रमन्त्री आरजु राणा देउवालाई राहदानी छपाइसम्बन्धी भ्रष्टाचार आरोपको अनुसन्धानका क्रममा बयानका लागि उपस्थित हुन म्याद तामेल गरेको छ। आयोगले सूचना बुझेको वा घरदैलोमा टाँस भएको मितिले बाटोको म्यादबाहेक तीन दिनभित्र आयोगमा उपस्थित हुन निर्देशन दिएको हो।

सूचनाअनुसार आरजु राणालाई आयोगको महाशाखा नम्बर १२, कोठा नम्बर १२, टंगाल काठमाडौंमा उपस्थित हुन भनिएको छ। तोकिएको अवधिमा उपस्थित नभए कानुनबमोजिम प्रक्रिया अघि बढाइने आयोगले जनाएको छ।

‘यस आयोगमा परेको वादी नेपाल सरकार प्रतिवादी आरजु राणा देउवा समेत भएको राहदानी छपाई सम्बन्धी कार्यमा भ्रष्टाचारजन्य कसुर गरेको भन्ने उजुरीको अनुसन्धानको सिलसिलामा तपाईंसँग बयान लिनुपर्ने भएकोले यो सूचना बुझेको वा तपाईँको घरदैलोमा टाँस भएको मितिले बाटोको म्याद बाहेक ३ (तीन) दिनभित्र यस आयोगको महाशाखा नं. १२, कोठा नं. १२ टंगाल, काठमाडौंमा उपस्थित हुन आउनु होला, नआए कानुन बमोजिम हुनेछ,’ सूचनामा भनिएको छ।