बैंकहरुमा ६० अर्ब बढी गैर–बैीकङ सम्पत्ति, व्यवस्थापनमा कठिनाईः सीबीफीन अध्यक्ष श्रेष्ठ

काठमाडौं। बैंक तथा वित्तीय संस्था परिसंघ, नेपाल (सिबिफिन) का अध्यक्ष प्रचण्डबहादुर श्रेष्ठले मुलुकको बैंकिङ क्षेत्र अहिले गम्भीर दबाबमा रहेको बताए। उनले आगामी मौद्रिक नीतिले बैंकिङ क्षेत्रले भोगिरहेका यथार्थ समस्यालाई सम्बोधन गर्दै वित्तीय स्थायित्व र आर्थिक पुनरुत्थानबीच सन्तुलन कायम गर्नुपर्नेमा जोड दिए।

नेपाल आर्थिक पत्रकार समाज (सेजन) ले आयोजना गरेको ‘आर्थिक वृद्धिलाई गति दिन मौद्रिक नीतिको भूमिका’ विषयक कार्यक्रममा उनले यस्तो बताएका हुन्।

कागजमा बैंकिङ प्रणालीमा पर्याप्त तरलता देखिए पनि वास्तविक अर्थतन्त्रमा कर्जाको माग घटेको छ भने व्यावसायिक आत्मविश्वास कमजोर बनेको छ। विभिन्न आर्थिक क्षेत्रहरूमा नगद प्रवाह कमजोर भएकाले बलिया र सक्षम व्यवसायहरूको समेत ऋण भुक्तानी गर्ने क्षमता प्रभावित भएको उनको भनाइ छ।

उनले यही अवस्थाको प्रत्यक्ष असर बैंकहरुको सम्पत्ति व्यवस्थापनमा परेको उल्लेख गर्दै बैंकहरुले ६० अर्ब रुपैयाँभन्दा बढीको गैर–बैीकङ सम्पत्ति थुपार्न बाध्य भएको बताए। धेरै ऋणीले ऋण तिर्न नसक्दा बैंकहरुले धितो सम्पत्ति स्वीकार गर्नु परेको र ठूलो परिमाणमा बैंकहरुको पुँजी अनुत्पादक सम्पत्तिमा फसेको उनको भनाइ थियो।