राष्ट्रिय वाणिज्य बैंकमा जागिरको अवसर, साउन ८ सम्म आवेदन दिन सकिने

काठमाडौँः सरकारी स्वामित्वको राष्ट्रिय वाणिज्य बैंकले खुला प्रतियोगितामार्फत स्थायी पदपूर्तिका लागि विभिन्न तहका कर्मचारी भर्ना प्रक्रिया सुरु गरेको छ। बैंकले शुक्रबार सूचना जारी गर्दै तह ५ देखि तह ९ सम्मका विभिन्न पदमा योग्य नेपाली नागरिकबाट अनलाइन आवेदन आह्वान गरेको हो।

बैंकका अनुसार वरिष्ठ प्रबन्धक (तह ९), प्रबन्धक (तह ८), उपप्रबन्धक (तह ७) तथा प्रशासन, कानुन, सूचना प्रविधि (आईटी), लेखा, कृषि र इन्जिनियरिङ समूहका सहायक प्रबन्धक (तह ६) पदमा कर्मचारी नियुक्ति गरिनेछ। त्यसैगरी, सातै प्रदेशका कार्यालयका लागि प्रशासन, कानुन, नगद तथा सूचना प्रविधि समूहअन्तर्गत वरिष्ठ सहायक (तह ५) पदमा पनि उल्लेख्य संख्यामा कर्मचारी माग गरिएको छ।

आवेदन दिने उम्मेदवारले सम्बन्धित विषयमा मान्यता प्राप्त शिक्षण संस्थाबाट स्नातक वा स्नातकोत्तर तह उत्तीर्ण गरेको हुनुपर्ने बैंकले जनाएको छ। पदअनुसार आवश्यक योग्यता र अनुभवको विस्तृत विवरण बैंकले प्रकाशित गरेको सूचनामा उल्लेख गरिएको छ।

उमेरको हकमा अधिकृत स्तर (तह ६ देखि ९) का लागि न्यूनतम २१ वर्ष पूरा भई ३५ वर्ष ननाघेको तथा सहायक स्तर (तह ५) का लागि न्यूनतम १८ वर्ष पूरा भई ३५ वर्ष ननाघेको हुनुपर्नेछ। महिला तथा अपाङ्गता भएका उम्मेदवारका लागि अधिकतम उमेर सीमा ४० वर्षसम्म कायम गरिएको छ। बैंकमा कार्यरत कर्मचारीका हकमा भने उमेरको सीमा लागू हुने छैन।

इच्छुक उम्मेदवारले राष्ट्रिय वाणिज्य बैंकको आधिकारिक वेबसाइटमार्फत अनलाइन आवेदन दिन सक्नेछन्। आवेदन दिने अन्तिम म्याद सूचना प्रकाशित भएको मितिले २१ दिन अर्थात् साउन ८ गतेसम्म तोकिएको छ। तोकिएको समयभित्र आवेदन दिन नसकेका उम्मेदवारले थप सात दिनसम्म दोब्बर दस्तुर तिरेर आवेदन दिन सक्ने व्यवस्था गरिएको छ।

बैंकले परीक्षा शुल्क मोबाइल बैंकिङ तथा अन्य विद्युतीय माध्यमबाट भुक्तानी गर्न सकिने जनाएको छ। उम्मेदवारको छनोट लिखित परीक्षा, आवश्यकताअनुसार प्रस्तुतीकरण तथा अन्तर्वार्ताको आधारमा गरिनेछ।

लिखित परीक्षाको मिति, परीक्षा केन्द्र र विस्तृत पाठ्यक्रम बैंकको आधिकारिक वेबसाइटमार्फत पछि सार्वजनिक गरिने बैंकले जनाएको छ। थप जानकारीका लागि बैंकको केन्द्रीय कार्यालयस्थित मानव संसाधन विभागमा सम्पर्क गर्न सकिने सूचनामा उल्लेख गरिएको छ।