११ महिनामा वाणिज्य बैंकहरूको खुदनाफा साढे ६४ अर्ब: बढी कमाउने नबिल, कम एनआईसी

काठमाडौँ: चालू आर्थिक वर्ष २०८२/०८३ को जेठ मसान्तसम्म नेपालका २० वाणिज्य बैंकले ६४ अर्ब ५६ करोड ४० लाख रुपैयाँ खुदनाफा आर्जन गरेका छन्। नेपाल राष्ट्र बैंकले सार्वजनिक गरेको जेठ मसान्तसम्मको तथ्यांकअनुसार सञ्चालनमा रहेका सबै बैंकहरु नाफामा रहेका छन्।

वैशाख मसान्तसम्म ५६ अर्ब ४७ करोड ५० लाख रुपैयाँ रहेको बैंकहरूको कुल नाफा जेठमा आठ अर्ब आठ करोड ९० लाख रुपैयाँ बढेको छ। वैशाखको तुलनामा जेठमा बैंकको नाफा १४.३२ प्रतिशत वृद्धि भएको राष्ट्र बैंकले जनाएको छ।

खुद नाफाका आधारमा नबिल बैंक पहिलो स्थानमा रहेको छ। बैंकले आठ अर्ब ४९ करोड २२ लाख रुपैयाँ नाफा कमाएको छ। दोस्रो स्थानमा ग्लोबल आइएमई बैंक रहेको छ। ग्लोबल आइएमईले पाँच अर्ब ९७ करोड ८३ लाख रुपैयाँ नाफा गरेको छ।

तेस्रो स्थानमा रहेको कुमारी बैंकले चार अर्ब ७० करोड ७० लाख रुपैयाँ खुद नाफा आर्जन गरेको छ। नेपाल इन्भेष्टमेन्ट मेगा बैंकले चार अर्ब ४९ करोड ११ लाख, एभरेष्ट बैंकले चार अर्ब १२ करोड ३४ लाख तथा प्राइम कमर्सियल बैंकले तीन अर्ब ७४ करोड ९५ लाख रुपैयाँ नाफा कमाएका छन्।

त्यसैगरी सरकार स्वामित्वको राष्ट्रिय वाणिज्य बैंकको नाफा तीन अर्ब ७२ करोड ४९ लाख, एनएमबी बैंकको तीन अर्ब ६३ करोड आठ लाख, नेपाल बैंकको तीन अर्ब ३२ करोड ७७ लाख रहेको छ।

यसैगरी सानिमा बैंकको तीन अर्ब १२ करोड २४ लाख, लक्ष्मी सनराइज बैंकको दुई अर्ब ८९ करोड ३२ लाख, सिद्धार्थ बैंकको दुई अर्ब ८० करोड १७ लाख र स्ट्यान्डर्ड चार्टर्ड बैंक नेपालको दुई अर्ब ६२ करोड ४२ लाख रुपैयाँ रहेको छ।

यस्तै माछापुच्छ्रे बैंकले दुई अर्ब १७ करोड ७१ लाख, कृषि विकास बैंकले एक अर्ब ९५ करोड ८९ लाख, नेपाल एसबिआई बैंकले एक अर्ब ८३ करोड ८४ लाख, सिटिजन्स बैंकले एक अर्ब ७४ करोड ६१ लाख, प्रभु बैंकले एक अर्ब ५० करोड ४८ लाख र हिमालयन बैंकले एक अर्ब १६ करोड ४३ लाख रुपैयाँ नाफा कमाएका छन्।

सबैभन्दा कम नाफा एनआईसी एसिया बैंकको ५० करोड ७७ लाख रुपैयाँ रहेको छ।