अधिक तरलता व्यवस्थापन गर्न राष्ट्र बैंकले १ खर्ब रुपैयाँ निक्षेप तान्दै

काठमाडौँः बैंकिङ प्रणालीमा बढ्दो तरलता नियन्त्रण गर्ने उद्देश्यले नेपाल राष्ट्र बैंकले बजारबाट १ खर्ब रुपैयाँ बराबरको निक्षेप संकलन गर्ने भएको छ। राष्ट्र बैंकको मौद्रिक व्यवस्थापन विभागले बुधबार ९१ दिन अवधिको निक्षेप संकलन उपकरणमार्फत उक्त रकम उठाउन बोलकबोल आह्वान गरेको हो।

यस प्रक्रियामा ‘क’, ‘ख’ र ‘ग’ वर्गका बैंक तथा वित्तीय संस्थाले मात्रै सहभागिता जनाउन पाउनेछन्। इच्छुक संस्थाले बुधबार दिउँसो ३ बजेसम्म राष्ट्र बैंकको अनलाइन बिडिङ प्रणालीमार्फत आवेदन दर्ता गर्नुपर्नेछ।

निक्षेप संकलन उपकरणको ब्याजदर प्रतिस्पर्धात्मक बोलकबोलबाट निर्धारण गरिनेछ। सहभागी संस्थाले आवश्यकताअनुसार फरक–फरक ब्याजदरमा पनि प्रस्ताव पेश गर्न सक्ने व्यवस्था गरिएको छ। संकलित निक्षेपको साँवा तथा ब्याज आगामी असोज २८ गते एकमुष्ट भुक्तानी गरिने राष्ट्र बैंकले जनाएको छ।

बोलकबोलमा न्यूनतम १० करोड रुपैयाँदेखि आवेदन दिन सकिनेछ भने त्यसपछि ५ करोड रुपैयाँका गुणक ९मल्टिपल० मा कुल आह्वान गरिएको रकमसम्म प्रस्ताव पेश गर्न सकिने व्यवस्था छ।

रकम बाँडफाँड गर्दा सबैभन्दा कम ब्याजदर प्रस्ताव गर्ने संस्थालाई पहिलो प्राथमिकता दिइनेछ। एउटै ब्याजदरमा प्राप्त आवेदन कुल निष्कासन रकमभन्दा बढी भएमा ‘प्रो–राटा’ प्रणालीका आधारमा रकम बाँडफाँड गरिने राष्ट्र बैंकले स्पष्ट पारेको छ।

यस निक्षेप संकलन उपकरणमा गरिएको लगानीलाई अनिवार्य नगद मौज्दात (सीआरआर) मा गणना गर्न नपाइने भए पनि वैधानिक तरलता अनुपात (एसएलआर) तथा अन्य तरलता अनुपात गणनामा भने समावेश गर्न सकिने व्यवस्था रहेको छ।

राष्ट्र बैंकका अनुसार उक्त निक्षेप संकलन उपकरणलाई राष्ट्र बैंकबाहेक अन्य बैंक तथा वित्तीय संस्थामा धितोका रूपमा पनि प्रयोग गर्न सकिनेछ। यद्यपि, यसको अवधि पूरा हुनुअघि साँवा फिर्ता वा प्रिम्याच्योर भुक्तानीको सुविधा उपलब्ध नहुनेछ।