झापाको विर्तामोडमा ५ तारे होटल बनाउँदै दुर्गा प्रसाईँ, लगानी सवा तीन अर्ब

काठमाडौँ: पछिल्लो समय  मुलुकका ठूला शहर र प्रमुख पर्यटकीय गन्तव्यहरुमा अर्बौं रुपैयाँ लगानीमा होटल तथा लक्जरी रिसोर्ट खुल्ने क्रम बढेको छ। होटलमा बैंक तथा वित्तीय संस्थाहरुले सहजरुपमा ऋण लगानी गरिरहेका छन्।

यसैगक्रममा मेडिकल व्यवसायी दुर्गा प्रसाईंले पनि होटलमा लगानी गरेका छन्। उनले सवा तीन अर्ब रुपैयाँ लगानीमा पाँचतारे लक्जरी होटल सञ्चालनमा ल्याउने भएका छन्। व्यवसायी प्रसाईंले तीन अर्ब २९ करोड ८० लाख रुपैयाँ लगानीमा झापाको विर्तामोडमा पाँचतारे होटल एट्रियम प्राइभेट लिमिटेड सञ्चालनमा ल्याउन लागेका हुन्।

होटललाई आवश्यक दुई अर्ब ३७ करोड रुपैयाँ ऋणको व्यवस्थापन भइसकेको छ। ७० प्रतिशत ऋण र बाँकी ३० प्रतिशत संस्थापकको स्वपुँजी (इक्विटी) हुने गरी लगानी संरचना बनाइएको छ।

होटलको सिभिल, मेकानिकल र फर्निचरसम्बन्धी थप कामहरू, बैंक्वेट र क्यासिनो क्षेत्रको डिजाइनमा गरिएका परिवर्तनहरूस क्यासिनो सुविधाको विस्तार तथा निर्माण अवधि लम्बिएका कारण बढ्ने ब्याज खर्चजस्ता कारणहरूले गर्दा होटलको लागत बढ्ने अनुमान गरिएको छ।

परियोजना निर्माणको काम निकै अघि बढिसकेको छ। यद्यपि, निर्धारित समय र लागतभित्रै परियोजना सम्पन्न गर्ने सन्दर्भमा यस होटल परियोजनासँग सम्बन्धित कार्यान्वयनका बाँकी जोखिमहरू भने कायमै छन्।

होटलमा ९८ वटा कोठा हुने भएको छ। रेस्टुरेन्ट, स्विमिङ पुल, सम्मेलन तथा ब्याक्वेट हल, स्पा, क्यासिनोलगायत अन्य सुविधाहरू समावेश छन्। सामान्यतया, होटलहरूमा सम्बन्धित स्थिर लागत असूल गरी नाफा कमाउन सुरु गर्न लामो समय लाग्ने गर्दछ।

होटलको सञ्चालनमा आउन लाग्ने यस्तो लामो समयको मुख्य कारण भनेको उच्च स्तरको होटल निर्माणमा तीनदेखि चार वर्षसम्म लाग्ने र सञ्चालनलाई व्यवस्थित वा स्थिर अवस्थामा ल्याउन थप दुईदेखि तीन वर्ष लाग्ने गरेको छ।

एकपटक सञ्चालनमा आएपछि, ग्राहकहरूलाई आकर्षित गर्ने, कोठाको अकुपेन्सी दर कायम राख्ने, आफ्नो ब्रान्ड स्थापित गर्ने र परिकल्पना गरिए बमोजिम होटलबाट लाभ हासिल गर्ने कम्पनीको क्षमता कर्जाको दृष्टिकोणबाट अत्यन्त महत्वपूर्ण हुनेछ।

होटल चन्द्रगढी एयरपोर्टबाट १२.९ र नेपाल–भारत सिमाना जोगवनीबाट ३० किलोमिटर दुरीमा छ। यस्तै इलामा चिया बगानबाट ५७ किलोमिटर दुरीमा छ। होटलले भारतीय पर्यटकलाई लक्षित गरेको देखिएको छ।

होटलका अध्यक्ष प्रसाईं रहेका छन्। उनले झापामा बिएन्डसी मेडिकल कलेज सञ्चालन गरिरहेका छन्। यस्तै उनी पूर्वाञ्चल क्यान्सर अस्पतालका सञ्चालक पनि हुन्। केही वर्षयता उनले ऋण नतिर्ने अभियान चलाउदै आएका छन्।

प्रसाईंले होटल सन् २०१६ मा स्थापना गरेका हुन्। होटल १६ हजार ८४३ वर्गमिटर क्षेत्रफलमा फैलिएको छ।