स्मार्ट टेलिकम प्रकरणः पूर्व अध्यक्ष भूपेन्द्र भण्डारी सीआईबीको नियन्त्रणमा

काठमाडौँः स्मार्ट टेलिकमको सम्पत्ति व्यवस्थापनमा भएको कथित अनियमिततासम्बन्धी अनुसन्धानका क्रममा नेपाल दूरसञ्चार प्राधिकरणका पूर्वअध्यक्ष भूपेन्द्र भण्डारी पक्राउ परेका छन्।

प्रहरीको केन्द्रीय अनुसन्धान ब्युरो (सीआईबी) ले भण्डारीलाई शुक्रबार ललितपुरको धापाखेलबाट नियन्त्रणमा लिएको हो। स्मार्ट टेलिकमको सम्पत्ति व्यवस्थापन प्रक्रियामा ढिलाइ हुँदा राज्यलाई ठूलो आर्थिक क्षति पुगेको आशंकामा उनीमाथि अनुसन्धान अघि बढाइएको सीआईबीले जनाएको छ।

सीआईबीका प्रवक्ता एसएसपी अनुपम शमशेर जबराका अनुसार भण्डारीमाथि स्मार्ट टेलिकम प्रकरणमा विस्तृत अनुसन्धान भइरहेको छ। अनुसन्धानका क्रममा आवश्यक बयान तथा प्रमाण संकलनको प्रक्रिया अघि बढाइएको उनले बताए।

भण्डारी यसअघि सञ्चार तथा सूचना प्रविधि मन्त्रालयअन्तर्गत नेपाल दूरसञ्चार प्राधिकरणको अध्यक्षका रूपमा कार्यरत थिए। उनी निवर्तमान सञ्चारमन्त्री रेखा शर्माको सचिवालयमा विज्ञको भूमिका निर्वाह गरेपछि प्राधिकरणको नेतृत्वमा नियुक्त भएका थिए।

यसअघि टेरामक्स प्रकरणमा तत्कालीन अध्यक्ष पुरुषोत्तम खनालविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेपछि अध्यक्ष पद रिक्त भएको थियो। त्यसपछि सरकारले भण्डारीलाई प्राधिकरणको अध्यक्ष नियुक्त गरेको थियो।

पछि काठमाडौं महानगरपालिकाका प्रमुख बालेन्द्र शाह नेतृत्वको कार्यवाहक सरकारद्वारा वैशाखको तेस्रो सातादेखि राजनीतिक नियुक्तिबाट आएका पदाधिकारीहरूलाई पदमुक्त गर्ने निर्णयसँगै भण्डारी पनि पदमुक्त भएका थिए।