नेपाल भर्सेस नेदरल्यान्ड्सः सुपर सिक्समा पुग्न जित्नै पर्ने दबाब

काठमाडौं – आइसीसी विश्वकप छनोट–२०२३ को समूह चरणको आफ्नो अन्तिम खेलमा नेपालले आज नेदरल्यान्ड्ससँग खेल्दैछ। जिम्बाबेको टाँगासिंगा स्पोर्ट्स क्लबको मैदानमा हुने खेलमा नेपाल जीतको लक्ष्यसहित नेदरल्यान्ड्ससँग भिड्दैछ।

नेपाल र नेदरल्यान्ड्सबीचको खेल नेपाली समयअनुसार दिउँसो १२ः४५ बजे हुनेछ। प्रतियोगिताको सुपर सिक्समा पुग्ने सम्भावना जीवितै राख्नका लागि नेपाललाई नेदरल्यान्ड्सविरुद्धको खेल जित्नैपर्ने हुन्छ।

दुवै टिमले अहिलेसम्म एक एक जित निकालेका छन्। त्यसैले यि दुईमध्ये आज जित निकाल्ने टिम मात्र अर्को चरणका लागि छनोट हुनेछ। त्यसैले नेपाललाई आजको खेलमा जित नकाल्नुको विकल्प छैन्। एकदिवसीय अन्तर्राष्ट्रिय खेलमा नेपाल र नेदरल्यान्ड्स दुवै निकै बलिया टिम हुन्। हालसम्म यि टिमले आपसमा दुई पटक भिडे्का छन्। दुवै टोलीले समान एक–एक जीत हाँसिल गरेका छन्।

जारी प्रतियोगिताको समूह ‘ए’ मा नेपालसँगै जिम्बाबे, वेस्टइन्डिज, नेदरल्यान्ड्स र अमेरिका छन्। अमेरिका लगातार तीन खेलमा पराजित हुँदै सुपरसिक्सको सम्भावनाबाट बाहिरिएको छ। त्यसैगरी जिम्बावे र वेस्ट इन्डिज प्रतियोगितामा लगातार दोस्रो जित दर्ता गर्दै सुपर सिक्समा स्थान सुनिश्चित गरिसकेका छन्।

अब समूह ‘ए’ बाट तेस्रो टोलीको रुपमा नेपाल र नेदरल्यान्ड्समध्ये एक सुपर सिक्समा प्रवेश गर्नेछन्। नेपाल पहिलो खेलमा जिम्बावेसँग ८ विकेट पराजित भएको थियो भने दोस्रो खेलमा नेपालले अमेरिकालाई ६ विकेटले पराजित गरेको थियो। त्यस्तै तेस्रो खेलमा वेस्ट इन्डिजसँग १०१ रनले पराजित भएको थियो।

नेदरल्यान्ड्स पहिलो खेलमा जिम्बाबेसँग ६ विकेटले पराजित भएको थियो भने दोस्रो खेलमा अमेरिकालाई ५ विकेटले पराजित गरेको थियो। यससँगै तीन खेलपछि नेपालको दुई अङ्क छ भने दुई खेलेको नेदरल्यान्ड्सको पनि समान दुई अङ्क नै छ। नेपाल अङ्क तालिकाको चौथो स्थान र नेदरल्यान्ड्स तेस्रो स्थानमा छ।

यसअघि नेपाल र नेदरल्यान्ड्को खेल दुई खेलको सिरिजको समयमा भएको थियो। पहिलो भेट २०१८ अगस्ट १ मा भएको थियो। यो भेट नेपालका लागि ऐतिहासिक रहेको थियो किनभने यो खेल नै नेपाली क्रिकेटमा ओडिआई मान्यता प्राप्त पहिलो खेल रहेको थियो। नेपालले एक दिवसीयमा डेब्यु खेल नै नेदरल्यान्ड्सविरुद्ध खेलेको हो। तर, सो ऐतिहासिक खेल नेपालले गुमाएको थियो।

उक्त खेलमा नेपालले ५५ रनको हार बेहोरेको थियो।