नेपाल इन्भेष्टमेण्ट मेगा बैंकबारे बोल्यो राष्ट्र बैंक

काठमाडौँः नेपाल इन्भेष्टमेण्ट मेगा बैंक लिमिटेडका सञ्चालक तथा प्रमुख कार्यकारी अधिकृतविरुद्ध काठमाडौं जिल्ला अदालतमा अभियोगपत्र दायर भएको विषय सार्वजनिक भएपछि बैंकको सञ्चालन तथा व्यवस्थापनलाई लिएर उठेका चासोबारे नेपाल राष्ट्र बैंकले स्पष्ट पारेको छ। राष्ट्र बैंकले बैंकको वर्तमान वित्तीय तथा तरलता अवस्था सन्तोषजनक रहेको र दैनिक बैंकिङ कारोबारमा कुनै किसिमको जटिलता नदेखिएको जनाएको छ।

राष्ट्र बैंकले सार्वजनिक गरेको विज्ञप्तिअनुसार, अदालतमा अभियोगपत्र दायर भएको विषय आफ्नो जानकारीमा आएको छ। त्यस विषयमा बैंकको सञ्चालन तथा व्यवस्थापनसम्बन्धी अवस्थाको राष्ट्र बैंकले नजिकबाट अनुगमन गरिरहेको छ भने विद्यमान कानुनी व्यवस्थाका सन्दर्भमा आवश्यक राय–सुझाव लिने तथा छलफल गर्ने काम भइरहेको जनाएको छ।

राष्ट्र बैंकका अनुसार नेपाल इन्भेष्टमेण्ट मेगा बैंकको तरलताको अवस्था तथा वित्तीय सबलताका परिसूचकहरू तोकिएको मापदण्डअनुसार सन्तोषजनक रहेका छन्।

बैंकको दैनिक कार्य सञ्चालनमा कुनै किसिमको जटिलता उत्पन्न भएको अवस्था नदेखिएको राष्ट्र बैंकले स्पष्ट पारेको छ। यसले बैंकका ग्राहक तथा सरोकारवालामाझ उत्पन्न हुन सक्ने तत्कालीन आशंकालाई सम्बोधन गर्ने प्रयास गरेको देखिन्छ।

सञ्चालक तथा प्रमुख कार्यकारी अधिकृतसम्बन्धी विषय काठमाडौं जिल्ला अदालतमा विचाराधीन रहेको अवस्थामा पनि बैंकको दैनिक सञ्चालनमा त्यसको प्रत्यक्ष असर नपरेको राष्ट्र बैंकको भनाइ छ।

राष्ट्र बैंकले मुद्दाको प्रकृति, समयावधि र गम्भीरताका आधारमा बैंकको सञ्चालन अवस्थाबारे थप छलफल तथा कानुनी राय लिने प्रक्रिया अघि बढाइरहेको जनाएको छ।

यस क्रममा सञ्चालक समिति, उच्च व्यवस्थापन तथा बैंक सञ्चालनसम्बन्धी आवश्यक उपायहरू कानुनबमोजिम अवलम्बन गरिने राष्ट्र बैंकले स्पष्ट पारेको छ।

यद्यपि, विषय अदालतमा विचाराधीन रहेकाले राष्ट्र बैंकले यसलाई बेवास्ता नगरेको स्पष्ट छ। बैंकको सञ्चालन, व्यवस्थापन र विद्यमान कानुनी अवस्थाबारे आवश्यक अनुगमन तथा छलफल जारी राख्ने राष्ट्र बैंकले जनाएको छ।