कोहिनूरले पनि ल्यायो एएमओ सुविधा, अब बजार बन्दपछि पनि अर्डर राख्न सकिने

काठमाडौँः नेपाल स्टक एक्सचेन्ज (नेप्से) ले आफ्टर मार्केट अर्डर (एएमओ) को व्यवस्था गरेसँगै ब्रोकर कम्पनीहरूले उक्त सुविधा आफ्ना लगानीकर्तामाझ उपलब्ध गराउन थालेका छन्। यसैक्रममा ब्रोकर नम्बर ३५ कोहिनूरले पनि आफ्नो टीएमएसमा आफ्टर मार्केट अर्डर (एएमओ) सुविधा सञ्चालनमा ल्याएको छ।

नेप्सेले ‘धितोपत्र कारोबार सञ्चालन (चौथो संशोधन) विनियमावली, २०८२’ जारी गर्दै आफ्टर मार्केट अर्डरको व्यवस्था गरेको थियो। उक्त संशोधित विनियमावली २०८३ वैशाख ७ गतेदेखि लागू भएको हो।

संशोधित विनियमावलीले नियमित कारोबार समयअघि वा पछि पनि लगानीकर्ताले ब्रोकर कम्पनीको प्रणालीमार्फत सेयर खरिद तथा बिक्रीको अर्डर राख्न सक्ने व्यवस्था गरेको छ। यही व्यवस्थाअनुसार ब्रोकर कम्पनीहरूले एएमओ सुविधा आफ्ना टीएमएसमा थप्न थालेका हुन्।

कोहिनूर सेक्युरिटिजले एएमओका लागि बेलुका ५ बजेदेखि अर्को दिन बिहान १० बजेसम्मको समय तोकेको छ।

यस अवधिमा लगानीकर्ताले कोहिनूरको टीएमएसमा लगइन गरी ‘टीएमएसमा आफ्टर मार्केट अर्डर (एएमओ)’ विकल्पमार्फत सेयर खरिद वा बिक्रीको अर्डर राख्न सक्नेछन्।

राखिएको अर्डर भने तत्काल कारोबार हुने होइन। उक्त अर्डर अर्को नियमित कारोबार सत्रमा बजार खुलेपछि प्रचलित नियमअनुसार प्रक्रियामा जानेछ।

एएमओ भनेको के हो?

आफ्टर मार्केट अर्डर भनेको नियमित सेयर कारोबारको समय सकिएपछि अर्को कारोबार दिनका लागि अग्रिम रूपमा खरिद वा बिक्रीको अर्डर राख्ने सुविधा हो।

यसअघि बजार बन्द भएपछि लगानीकर्ताले अर्को दिन बजार नखुलेसम्म टीएमएसमा खरिद–बिक्रीको अर्डर राख्न पाउँदैनथे। अब एएमओ सुविधामार्फत बजार बन्द भएको समयमा नै अर्को कारोबार दिनका लागि अर्डर तयार गर्न सकिने भएको छ।

उदाहरणका लागि, कुनै लगानीकर्ताले बेलुका बजार बन्द भएपछि भोलिपल्ट कुनै कम्पनीको सेयर खरिद गर्ने योजना बनाएमा उसले बजार खुल्ने समय कुर्नुपर्दैन। एएमओ खुला रहेको समयमा नै आवश्यक विवरण राखेर अर्डर तयार गर्न सक्छ। यो व्यवस्था विशेष गरि वैदेशिक रोजगारीमा रहेका नेपाली नागरिकका लागि लक्षित गरिएर ल्याईएको हो ।

कारोबारको समय भने बढेको होइन

एएमओ सुविधा आए पनि यसलाई नियमित सेयर कारोबारको समय बढेको भनेर बुझ्न भने मिल्दैन। यो मूलतः अर्को कारोबार सत्रका लागि अर्डर पहिल्यै राख्ने व्यवस्था हो।

यसले नियमित कारोबार समयमा व्यस्त हुने लगानीकर्तालाई आफ्नो सुविधाअनुसार अर्डर राख्न सहज बनाउनेछ। साथै, बजार खुल्नुअघि नै आफ्नो खरिद वा बिक्रीसम्बन्धी योजना प्रणालीमा राख्न सकिने भएकाले कारोबार प्रक्रियामा थप लचकता आउने अपेक्षा गरिएको छ।

ब्रोकरको टीएमएसमा थपिँदै एएमओ

नेप्सेको संशोधित विनियमावलीपछि एएमओ सुविधा कार्यान्वयनमा आए पनि यसको प्रयोग ब्रोकर कम्पनीको प्रणालीअनुसार हुने भएकाले लगानीकर्ताले आफ्नो ब्रोकरको टीएमएसमा सुविधा उपलब्ध भए÷नभएको हेर्नुपर्ने हुन्छ।

कोहिनूरले भने आफ्ना ग्राहकका लागि एएमओ सुविधा सञ्चालनमा ल्याइसकेको जनाएको छ।