ग्यास बिक्रेता महासंघले भन्यो: सरकार अनावश्यक प्रचारबाजीमा लाग्दा अभाव भयो

काठमाडौँ: ग्यास बिक्रेता महासंघले सरकारकै कारण खाना पकाउने एलपी ग्यासको अभाव भएको आरोप लगाएको छ। समाधानभन्दा अनावश्यक प्रचारबाजीमा लागेका कारण देशभर ग्यासको चरम अभाव भएको महासंघको भनाइ छ।

पछिल्लो चार महिनामा करिब ६० हजार मेट्रिकटन ग्यास कम आयात गरिएकाले समस्या थपिएको दाबी महासंघले गरेको छ। ग्यास अभाव समाधानमा सरकार गम्भीर नभएको आरोप उसको छ।

एलपी ग्यास विगत ४ महिनामा करिब ६० हजार मेट्रिकटन कम आयात गरिएको, ग्यासको प्रभावकारी वितरण च्यानल विक्रेतामार्फत ग्यास बिक्री नगरी ग्यास उद्योग र विभिन्न बिक्री केन्द्रमार्फत ग्यास बिक्री गर्ने निर्णयले ग्यासको अभाव थप जटिल बन्दै गएको महासंघको भनाइ छ।

अहिले पनि नयाँ सिलिन्डर बिक्री नरोकिनाले आगामी वर्षहरूमा पनि यो समस्या थप जटिल बनेर आउने निश्चित रहेको महासंघले बताएको छ।

‘बजारमा चाहिनेभन्दा बढी ८० लाख सिलिन्डर छरिएकाले आज यो स्थिति उत्पन्न भएको हो। अहिले पनि नयाँ सिलिन्डर बिक्री नरोकिनाले आगामी वर्षहरूमा पनि यो समस्या थप जटिल बनेर आउने निश्चित छ,’ विज्ञप्तिमा भनिएको छ।

प्रेस विज्ञप्ति

विगत मिति २०८२/११/२८ देखि देशभर खाना पकाउने ग्यासको चरम अभाव भएको सर्वविदितै छ। यति लामो समयसम्म ग्यास किन अभाव भयो भन्ने कुरामा सरकारको पटकै ध्यान पुगेको देखिन्न। विभिन्न सञ्चार माध्यममा हाम्रो महासंघ र उपभोक्तावादी संघसंस्थाबाट ग्यासको अभाव हुनुका कारणबारे स्पष्ट सत्य सार्वजनिक गर्दा पनि सरकार, नेपाल आयल निगम, वाणिज्य मन्त्रालय र सरकारका विभिन्न निकायहरू समस्याको समाधानभन्दा अनावश्यक प्रचारबाजीमा लागेको कुरा विगत केही दिनयता भएका गतिविधिले पुष्टि गर्दछ।

एलपी ग्यास विगत ४ महिनामा करिब ६० हजार मेट्रिकटन कम आयात गरिएको, ग्यासको प्रभावकारी वितरण च्यानल विक्रेतामार्फत ग्यास बिक्री नगरी ग्यास उद्योग र विभिन्न बिक्री केन्द्रमार्फत ग्यास बिक्री गर्ने निर्णयले ग्यासको अभाव थप जटिल बन्दै गएको छ। बजारमा चाहिनेभन्दा बढी ८० लाख सिलिन्डर छरिएकाले आज यो स्थिति उत्पन्न भएको हो। अहिले पनि नयाँ सिलिन्डर बिक्री नरोकिनाले आगामी वर्षहरूमा पनि यो समस्या थप जटिल बनेर आउने निश्चित छ।

अन्तमा सरकार, उद्योग र बिक्री केन्द्रका नामबाट आफैँ ग्यास बिक्री गर्ने, अनि अनुगमनका नाममा आम विक्रेतालाई अनावश्यक दुःख दिने सरकारी रवैयाप्रति ग्यास बिक्रेता महासंघ घोर आपत्ति प्रकट गर्दछ। साथै तत्काल ग्यास उद्योग र विभिन्न नामका बिक्री केन्द्र बन्द गरी विक्रेतामार्फत बिक्रीवितरण सहज गरी उपभोक्तालाई अनावश्यक सास्ती नदिन र वास्तविक समस्या समाधानमा केन्द्रित हुन यसै विज्ञप्तिमार्फत सरकारसँग जोडदार माग गर्दछौँ।

अध्यक्ष
ज्ञानेश्वर अर्याल