एनसेल र नेपाल मेडिसिटी अस्पतालबीच साझेदारी, ग्राहकलाई निःशुल्क चिकित्सक परामर्श सेवा

काठमाडौँः एनसेल र नेपाल मेडिसिटी अस्पतालले गुणस्तरीय स्वास्थ्य सेवालाई सहज र किफायती बनाउने उद्देश्यले एनसेलका ग्राहकलाई निःशुल्क चिकित्सक परामर्श सेवा उपलब्ध गराउन साझेदारी गरेका छन्।

यस साझेदारीअन्तर्गत रु. २९९ वा सोभन्दा माथिको प्याक वा रेन्टल सेवा लिने एनसेल ग्राहकले नेपाल मेडिसिटी अस्पतालको बहिरङ्ग सेवामा निःशुल्क चिकित्सक परामर्श लिन सक्नेछन्। त्यस्तै, रु. ९९ देखि रु. २९९ सम्मको प्याक वा रेन्टल सेवा लिएका ग्राहकले बहिरङ्ग सेवाअन्तर्गत चिकित्सक परामर्श शुल्कमा २० प्रतिशत छुट पाउनेछन्।

मंगलबार आयोजित एक कार्यक्रममा एनसेलका चिफ कन्ज्युमर बिजनेस अफिसर उपाङ्ग दत्ता र नेपाल मेडिसिटी अस्पतालका प्रमुख कार्यकारी अधिकृत डा. अमित तोमरले यससम्बन्धी सम्झौतामा हस्ताक्षर गरेका हुन्।

साझेदारीबारे बोल्दै दत्ताले नेपाल मेडिसिटी अस्पतालको स्वास्थ्य सेवालाई एनसेलका प्याकसँग जोडेर ग्राहकलाई थप सुविधा प्रदान गर्न लागिएको बताए। उनले भने, ‘यसमा निःशुल्क चिकित्सक परामर्श सेवादेखि परामर्श शुल्कमा उल्लेखनीय छुटसम्मको व्यवस्था रहेको छ। यो साझेदारीले हाम्रा ग्राहकलाई केवल कनेक्टिभिटी मात्र नभई स्वस्थ जीवनका लागि पनि सहयोग सुनिश्चित गर्दछ। यो हाम्रा ग्राहकका लागि साँच्चै महत्त्वपूर्ण हुनेछ र ग्राहकलाई लाभ प्रदान गर्ने हाम्रो प्रतिबद्धताको अर्को कदम हो।’

साझेदारीअन्तर्गतको सेवा लिन योग्य एनसेल ग्राहकले एनसेल एपमा लगइन गर्नुपर्नेछ। त्यसपछि एपभित्र रहेको ‘पार्टनर्ड सर्भिसेज’ खण्डमा गई नेपाल मेडिसिटी अस्पताल छनोट गर्नुपर्नेछ। एपले योग्य ग्राहकले प्राप्त गर्ने सुविधाको विवरण स्वतः देखाउनेछ। योग्य नदेखिएका ग्राहकले आवश्यक प्याक वा रेन्टल सेवा लिएर यस सुविधाको लाभ लिन सक्नेछन्।

नेपाल मेडिसिटी अस्पतालका प्रमुख कार्यकारी अधिकृत डा. तोमरले चिकित्सा सेवामा पहुँच प्रदान गर्नुका साथै यस साझेदारीले कर्पोरेट क्षेत्र र स्वास्थ्य संस्थाले सहकार्य गरेर नेपालभरका समुदायका लागि गुणस्तरीय स्वास्थ्य सेवालाई थप पहुँचयोग्य, समावेशी र किफायती बनाउन सकिने उदाहरण प्रस्तुत गरेको बताए।

उनले यस्ता सहकार्यले नेपालको स्वास्थ्य सेवा प्रणालीलाई सुदृढ बनाउन महत्त्वपूर्ण भूमिका खेल्न सक्ने धारणा व्यक्त गरे।

एनसेलका अनुसार यो सहकार्य कनेक्टिभिटीमा मात्र सीमित नभई विश्वसनीय ब्रान्ड तथा अत्यावश्यक सेवा प्रदायकसँगको साझेदारीमार्फत ग्राहकलाई सान्दर्भिक र अर्थपूर्ण सुविधा उपलब्ध गराउने कम्पनीको निरन्तर प्रयासको एक हिस्सा हो। यस्ता पहलमार्फत एनसेलले आफ्ना ग्राहकको दैनिक जीवनमा थप मूल्य सिर्जना गर्दै उनीहरूको हित तथा कल्याणमा योगदान पुर्‍याउने लक्ष्य राखेको छ।