बाढी प्रभावित जिल्लामा दूरसञ्चार सेवा पुनःसुचारु गर्दै नेपाल टेलिकम

काठमाडौँः बाढीपहिरोबाट प्रभावित रसुवा, धादिङ, नुवाकोट र चितवनका विभिन्न क्षेत्रमा अवरुद्ध दूरसञ्चार सेवा पुनःसुचारु गर्न नेपाल टेलिकमले मर्मत तथा प्राविधिक कामलाई तीव्रता दिएको छ।

भदौ १० गते आएको बाढीपहिरोका कारण मानवीय तथा भौतिक संरचनामा क्षति पुग्नुका साथै यी चार जिल्लामा सञ्चालित नेपाल टेलिकमका विभिन्न सेवा प्रभावित भएका थिए। प्रभावित क्षेत्रमा सेवा सञ्चालनका लागि जेनेरेटर, ब्याट्री, इन्धन तथा प्राविधिक जनशक्ति परिचालन गरिएको टेलिकमले जनाएको छ।

रसुवाका न्यौपानेचौर र राम्चे रिपिटर साइटमा हेलिकोप्टरमार्फत जेनेरेटर, ब्याट्रीलगायत आवश्यक उपकरण पुर्‍याएर सेवा सुचारु गरिएको छ। यससँगै न्यौपानेचौर, राम्चे तथा आसपासका केस्पाङ ९काउले०, ठुलेगाउँ, तादी, फिकुरी, कालिकास्थान, ग्राङ, डाँडागाउँ, मैलुङ, पाङसाङ डाँडा, लाङटाङ र क्याङ्जिनलगायत क्षेत्रमा सञ्चार सेवा सञ्चालनमा आएको छ।

धुन्चेमा समेत सेवा सञ्चालनका लागि जेनेरेटर, इन्धन र कर्मचारी परिचालन गरिएको नेपाल टेलिकमले जनाएको छ।

त्यस्तै, नुवाकोटको मदनपुर, बट्टार, विदुर बसपार्क तथा धादिङको बैरेनी र ठमेलडाँडामा आवश्यक उपकरण र कर्मचारी परिचालन गरी सेवा सुचारु गर्ने काम भइरहेको छ।

नेपाल टेलिकमका अनुसार बाढीबाट प्रभावित चार जिल्लाका कुल १५२ साइटमध्ये ९२ साइट सञ्चालनमा आइसकेका छन् भने अझै ६० साइट सञ्चालनमा आउन बाँकी छन्।

चितवनका ५ मध्ये ३, धादिङका ३६ मध्ये १३, नुवाकोटका ७९ मध्ये ३१ र रसुवाका ३२ मध्ये १३ साइट अझै सञ्चालनमा आउन बाँकी रहेको कम्पनीले जनाएको छ।

प्रभावित क्षेत्रका मुख्य प्राथमिकतामा रहेका साइटलाई निरन्तर सञ्चालनमा ल्याउन जेनेरेटर, इन्धन तथा प्राविधिक जनशक्ति परिचालन गरिएको छ। साथै, सञ्चालनमा रहेका अन्य बीटीएस साइटमा कभरेज तथा क्षमता विस्तार र नेटवर्क अप्टिमाइजेसनको काम पनि भइरहेको छ।

विपद्को समयमा नागरिकको सञ्चार आवश्यकता सहज बनाउन सेवा निरन्तरता, पूर्वसूचना तथा सचेतना र आवश्यक प्राविधिक कार्यलाई उच्च प्राथमिकतामा राखिएको नेपाल टेलिकमले जनाएको छ। कम्पनीले यसबाट प्रभावित क्षेत्रका नागरिकलाई आफन्तजन तथा आवश्यक निकायसँग सञ्चार सम्पर्क कायम राख्न सहयोग पुग्ने विश्वास व्यक्त गरेको छ।