बन्द सरकारी उद्योग सरकारले चलाउँदैन, धुलो टक्टकाएर निजी क्षेत्रलाई दिन्छौँ: अर्थमन्त्री

काठमाडौँ: अर्थमन्त्री स्वर्णिम वाग्लेले लामो समयदेखि बन्द तथा अस्तव्यस्त अवस्थामा रहेका सरकारी स्वामित्वका उद्योग सरकार आफैँले नचलाउने स्पष्ट पारेका छन्। निश्चित प्रक्रियामार्फत निजी क्षेत्रलाई सञ्चालन गर्न दिने तयारी भइरहेको उनले बताए।

शुक्रबार नेपाल आर्थिक पत्रकार समाज (सेजन) को २८औँ साधारणसभामा अर्थमन्त्री वाग्लेले हेटौंडा सिमेन्ट उद्योग, उदयपुर सिमेन्ट उद्योग, हेटौंडा कपडा उद्योग र गोरखकाली रबर उद्योगलगायत सरकारी स्वामित्वका उद्योगको डिडिएसम्बन्धी काम अन्तिम चरणमा पुगेको जानकारी दिए।

बन्द रहेका उद्योगमा सरकारले बजेट पठाउने तर त्यसअनुसार काम अघि नबढ्ने अवस्था अन्त्य गर्न खोजिएको उनको भनाइ छ। सरकारले आवश्यक नीति बनाएर उद्योगलाई व्यवस्थित गर्दै निश्चित बिन्दुमा पुर्‍याएपछि निजी क्षेत्रलाई सञ्चालनको जिम्मा दिने उनले बताए।

‘सरकारले आवश्यक नीति बनाएर वर्षौंदेखि बजेट मात्र पठाउने तर काम नहुने अवस्था अन्त्य गर्न खोजिएको हो,’ वाग्लेले भने, ‘हामीले उद्योग चलाउन थालेको होइन, धुलो टकटकाउन मात्र लागिएको हो। उद्योग सरकारले चलाउने होइन, निजी क्षेत्रलाई नै चलाउन दिने हो।’

सरकारले उद्योग चलाउन थालेको भन्ने भाष्य अहिले नै निर्माण गर्नु उपयुक्त नभएको पनि उनले बताए। ‘सरकारले उद्योग नै चलाउन थाल्यो कि भन्ने छ, तर हामीले धुलो टक्टक्याएका मात्र हौँ,’ उनले भने, ‘यसलाई एउटा निश्चित बिन्दुमा पुर्‍याएर निजी क्षेत्रलाई नै दिने हो। त्यसैले अहिले नै जुन ‘प्रिम्याच्योर’ भाष्य निर्माण गर्न खोजिँदै छ, यो उपयोगी होइन।’

सरकारले विगतमा विवादित बनेका विषयलाई नछुने तर निजी क्षेत्रले सञ्चालन गर्न चाहेको अवस्थामा अपरेसनल लिजमार्फत उद्योग सञ्चालन गर्ने वातावरण बनाउने उनको भनाइ छ।