भोटेकोशी बाढीबाट प्रभावित अटोमोबाइल व्यवसायीको क्षति विवरण संकलन गर्दै नाडा

काठमाडौँ: भोटेकोसीमा आएको बाढी तथा डुबानबाट प्रभावित अटोमोबाइल व्यवसायीको क्षति विवरण नाडा अटोमोबाइल्स एशोसिएसन अफ नेपालले संकलन थालेको छ।

बाढी तथा डुबानका कारण देशका विभिन्न क्षेत्रमा अटोमोबाइल व्यवसायसँग सम्बन्धित पूर्वाधारमा क्षति पुगेको भन्दै नाडाले प्रभावित सदस्य तथा व्यवसायीलाई आवश्यक सहजीकरण र समन्वयका लागि सरकारी निकाय, बीमा कम्पनी, बैंक तथा वित्तीय संस्था, भन्सार कार्यालयलगायत सरोकारवाला निकायसँग पहल थालेको जनाएको छ।

नाडाका अनुसार भन्सार नाकालगायतका स्थानमा आयातित सवारीसाधनमा क्षति पुगेको तथा केही सवारीसाधन हराएको जानकारी प्राप्त भएको छ। त्यस्तै, व्यवसायीका गोदाम, कार्यालय, उपकरण तथा अन्य व्यावसायिक सम्पत्तिमा समेत क्षति पुगेको छ।

नाडाले प्रभावित सदस्य कम्पनीहरूलाई क्षतिको यथार्थ तथा प्रमाणित विवरण सचिवालयमा उपलब्ध गराउन आग्रह गरेको छ। विवरणमा क्षतिग्रस्त तथा हराएका सवारीसाधन, सवारीसाधन रहेको स्थान र सम्बन्धित भन्सार नाका, सवारीसाधनको संख्या तथा प्रकार, गोदाम र कार्यालयमा भएको क्षति, बीमा गरिएको सम्पत्ति, बीमा दाबीका लागि आवश्यक कागजात र बैंक तथा वित्तीय संस्थाबाट लिइएको ऋणसम्बन्धी विवरण समावेश गर्न भनिएको छ।

प्राप्त विवरणका आधारमा नाडाले सम्बन्धित बीमा कम्पनीसँग समन्वय गरी बीमा दाबी प्रक्रिया सहज बनाउन तथा भन्सार नाकामा रहेका हराएका वा क्षतिग्रस्त सवारीसाधनको पहिचान र आवश्यक प्रक्रियाका लागि भन्सार कार्यालयसँग समन्वय गर्ने जनाएको छ।

त्यस्तै, प्रभावित व्यवसायीले बैंक तथा वित्तीय संस्थाबाट लिएको ऋणको पुनर्संरचना, भुक्तानी अवधि पुनरावलोकन तथा अन्य सम्भावित सहजीकरणका विषयमा पनि सम्बन्धित निकायसँग समन्वय गर्ने नाडाले जनाएको छ।