कस्तुप र प्रीतिको ‘मनमा पीर भएनि नाचिन्छ’

काठमाडौँ: गायिका प्रीति आलेको स्वरमा नयाँ गीत सार्वजनिक भएको छ। गीतमा कस्तुप पन्तको शब्द तथा संगीत रहेको छ भने रमेश सेन्चुरीले संगीत संयोजन गरेका छन्।

प्रेम, जीवन र खुसीलाई केन्द्रमा राखिएको गीतले जीवन छोटो भएकाले अनावश्यक पीर, चिन्ता र मनमुटावमा अल्झिनुभन्दा खुसीसाथ बाँच्नुपर्ने भाव प्रस्तुत गर्छ। गीतका शब्दमा माया–प्रेम, आपसी सद्भाव, मित्रता र सकारात्मक सोचलाई प्राथमिकता दिइएको छ।

गीतमा ‘मनमा पीर भए पनि नाचिन्छ’, ‘छोटो जीवन पीर लिने किन’ जस्ता भावमार्फत जीवनलाई सहज र रमाइलो ढंगले जिउनुपर्ने सन्देश दिइएको छ। प्रेममा इमानदार रहन, कसैको मन नदुखाउन तथा दुःखमा साथ दिनसमेत गीतले आग्रह गरेको छ।

गीतको संगीत संयोजन रमेश सेन्चुरीले गरेका छन् भने कुमार रानाले मिक्सिङ तथा मास्टरिङ गरेका छन्। खुमन राना र सुमन राना रेकर्डिस्ट रहेको गीत मारुनी डिजिटलमा रेकर्ड गरिएको हो। गीतको अडियो तथा भिडियो सारथी म्युजिक प्रालिले प्रस्तुत गरेको छ।

गीतको भिडियोमा गायिका प्रीति आलेकै अभिनय छ। भिडियोको निर्देशन तथा कोरियोग्राफी स्मृति तिमिल्सिना ‘गुरुआमा’ले गरेकी छन्। छायांकन करण चाइसिरले गरेका छन् भने सम्पादन नवीन घर्तीमगरले गरेका छन्। भिडियोको पोस्ट प्रोडक्सन गुरुआमा फिल्म्सले गरेको हो।