एनआरएन डेभलपमेन्ट फण्डको ८ अर्बको आईपीओको बाटो खुल्यो, आईपीओ निष्कासन कहिले ?

काठमाडौँः गैरआवासीय नेपाली (एनआरएन) को लगानीमा स्थापना हुन लागेको एनआरएन नेपाल डेभलपमेन्ट फण्डले ८ अर्ब ५ करोड रुपैयाँ बराबरको आईपीओ निष्कासन गर्ने बाटो खुलेको छ।

नेपाल सरकारले गैरआवासीय नेपालीसँग संयुक्त रूपमा स्थापना गरेका कम्पनीले जारी पुँजीको ८५ प्रतिशतसम्म सेयर सार्वजनिक निष्कासन गर्न सक्ने गरी धितोपत्र दर्ता तथा निष्काशन (आठौं संशोधन) नियमावली, २०८३ संशोधन गरेसँगै फण्डलाई ठूलो आकारको आईपीओ निष्कासन गर्ने कानुनी आधार बनेको हो।

प्रस्तावित १० अर्ब रुपैयाँ चुक्ता पुँजीमध्ये ५ प्रतिशत नेपाल सरकारको, १० प्रतिशत संस्थापक समूहको र बाँकी ८५ प्रतिशत गैरआवासीय नेपालीलाई आईपीओमार्फत निष्कासन गर्ने योजना रहेको छ। यसअनुसार गैरआवासीय नेपालीबाट करिब ८ अर्ब ५० करोड रुपैयाँ संकलन गर्ने लक्ष्य छ।

यसअघि विद्यमान व्यवस्थाअनुसार यस्तो कम्पनीले सार्वजनिक निष्कासनमार्फत सीमित हिस्सामात्र सेयर जारी गर्न सक्ने अवस्था थियो। नयाँ व्यवस्थाले गैरआवासीय नेपालीको लगानीलाई ठूलो हिस्सा समेट्ने गरी आईपीओ ल्याउने बाटो खोलेको हो।

फण्डका प्रमुख कार्यकारी अधिकृत (सीईओ) अनलराज भट्टराईले नियमावली संशोधनसँगै गैरआवासीय नेपालीको लगानीका लागि नयाँ अध्याय सुरु भएको बताएका छन्। उनले सरकार, अर्थ मन्त्रालय, नेपाल धितोपत्र बोर्ड, नेपाल राष्ट्र बैंकलगायत सम्बन्धित निकायप्रति आभार व्यक्त गर्दै यो सुरुवात मात्रै भएको उल्लेख गरेका छन्।

‘एनआरएन लगानी यात्रामा यो महत्वपूर्ण उपलब्धि हो। सरकार, अर्थ मन्त्रालय, नेपाल धितोपत्र बोर्ड, नेपाल राष्ट्र बैंकलगायत सम्बन्धित सबै निकायको सहकार्यबाट यो सम्भव भएको हो। अब गैरआवासीय नेपालीको पुँजीलाई नेपालका उत्पादनमूलक तथा पूर्वाधारका क्षेत्रमा परिचालन गर्ने थप अवसर खुलेको छ। यो सुरुवात हो, आगामी दिनमा एनआरएन लगानीलाई थप सहज, व्यवस्थित र प्रभावकारी बनाउनेतर्फ हामी केन्द्रित हुनेछौं,’ उनले भने ।

फण्डले गैरआवासीय नेपालीबाट संकलित पुँजीलाई पूर्वाधार, जलविद्युत्, पर्यटन, कृषि, सूचना प्रविधिलगायत उत्पादनमूलक क्षेत्रमा परिचालन गर्ने लक्ष्य राखेको छ।

नयाँ व्यवस्थाले गैरआवासीय नेपालीको सानो–ठूलो बचतलाई संस्थागत रूपमा नेपालमा परिचालन गर्ने अवसर बढाउने अपेक्षा गरिएको छ। फण्डको आईपीओ निष्कासन प्रक्रिया भने नियामकीय स्वीकृति तथा आवश्यक तयारी पूरा भएपछि अघि बढ्नेछ।

अब गैरआवासीय नेपालीको लागि आईपीओ जारी गर्न भने केहि समय लाग्ने सीईओ भट्टराईले बताएका छन् । ‘सबै प्रक्रिया पुरा भएको छ, अब पुँजी जुटाउने काम सुरु हुन्छ । आईपीओ निष्कासन गर्नको लागि भने ५ देखि ६ महिना जति लाग्छ होला,’ उनले भने ।