दशैँ एकातिर, धान भित्र्याउने चटारो अर्कातिर

डडेल्धुराको भित्री मधेस आलिताल र परशुरामका किसान पनि आजभोलि धान काट्ने, बिटा बाँध्ने, झार्ने र भित्र्याउनमै व्यस्त छन्। केही दिनअघिसम्मको लगातारको वर्षाका कारण पाकेको धान भित्र्याउन अहिले पनि समस्या भइरहेको परशुराम नगरपालिका–४ की किसान यशोदा जोशी बताउँछिन्।

‘मिहिनेत गरेर फलाएको धानबाली भित्र्याउन नपाउने चिन्ता छ, मौसमले साथ दिए हुन्थ्यो’, उनले भनिन्, ‘दशैँभन्दा पनि किसानका लागि खेतमा लगाएको बाली भित्र्याउने मुख्य प्राथमिकता छ।’

वर्ष दिनमा आउने चाड रमाइलो गरी मनाउन रहर भए पनि फुर्सद नपाउँदा खेतमै अधिकांश समय बित्ने गरेको किसानको भनाइ छ। बर्खेबाली भित्र्याउने र हिउँदे बाली छर्ने समय भएकाले किसानलाई दशैँतिहार मनाउनभन्दा पनि खेतबारीमै बढी व्यस्त हुनुपरेको अमरगढी नगरपालिका–७ की किसान कल्पना भट्ट बताउँछिन्।

उनले भनिन्, ‘यो समय कामको चटारो हुने हो। महिला बिहान उज्यालो नहुँदै खेतमा पुग्छन्। खाना खानसमेत फुर्सद नहुने किसानलाई दशैँको रमाइलोबारे थाहा भए पनि काम सक्नमै बढी ध्यान हुन्छ। त्यसमै सन्तुष्ट हुनुपर्छ।’

जिल्लामा सबैभन्दा बढी परशुराम नगरपालिकामा एक हजार २३७ हेक्टर क्षेत्रफलमा धान लगाइएको छ। जिल्लामा छ हजार १८८ हेक्टरमा बर्खे धानखेती हुने गरेको कृषि ज्ञान केन्द्र डडेल्धुराका प्रमुख नरेन्द्र पनेरुले बताए। जिल्लामा गत वर्ष बर्खे धान २१ हजार ४०० मेट्रिक टन उत्पादन भएको तथ्याङ्क छ।