लेकसाइडस्थित क्याम्पिङ चौरको मुहार फेरियो

पोखरा: पोखराको लेकसाइडस्थित हल्लनचोकमा रहेको क्याम्पिङ चौरमा वर्षौंदेखि थुपारिएको निर्माणजन्य फोहोर तथा अवशेष हटाई सो चौरलाई सम्याएर प्राकृतिक खुला र हराभरा मैदानका रूपमा विकास गर्न पोखरा महानगर लगायत सम्बन्धित निकायलाई सुझाव दिने गरी पोखरा एभेन्जर्सले सो चौरको सफाइ र लेभलिङ गर्ने काम गरिरहेको छ।

यस कार्यमा बुझाइको अस्पष्टता तथा विकासप्रतिको फरक दृष्टिकोणका कारण विभिन्न स्थानबाट अवरोध सामना गर्नुपरे तापनि हाल चौरलाई दुबो रोप्न मिल्ने अवस्थासम्म सम्याएर तयार गरिएको छ। गण्डकी प्रदेशको उद्दोग, पर्यटन तथा यातायात मन्त्रालय अन्तर्गतको पर्यटन महाशाखाको स्वामित्वमा रहेको उक्त चौरमा अब दुबो रोपेर हरियालीयुक्त प्राकृतिक खुला मैदानका रूपमा विकास गर्न पोखरा महानगरपालिकालाई अगुवाइ गर्न आवश्यक पहल र सहकार्यका लागि अनुरोध गरिनेछ।

यसैबीच, आगामी नेपाल प्रिमियर लिग (एनपीएल) का सम्पूर्ण खेल दर्शकले सामूहिक रूपमा हेर्न सक्ने गरी पोखरा एभेन्जर्सले उक्त चौरमा एक महिनासम्म सञ्चालन हुने फ्यान पार्क निर्माण गर्नेछ। फ्यान पार्कमार्फत क्रिकेटप्रेमीलाई खेल हेर्ने अवसर प्रदान गर्नुका साथै पोखराको पर्यटन, स्थानीय व्यवसाय र समग्र आर्थिक गतिविधिलाई प्रवर्द्धन गर्ने लक्ष्य राखिएको छ।

पोखरा एभेन्जर्सका प्रकाश लामिछानेले पोखराको पर्यटन विकासमा खेलकुदलाई प्रभावकारी माध्यमका रूपमा उपयोग गर्ने प्रतिबद्धता व्यक्त गरे।

‘हामीले आफ्नै ठाउँमा रहेका अवसर र चुनौती दुवैको पूर्ण अपनत्व लिँदै खेलकुदको माध्यमबाट पर्यटन विकास गर्न हामी पूर्ण रूपमा प्रतिबद्ध छौँ। सार्वजनिक स्थानको संरक्षण, सौन्दर्यीकरण र उपयोगमार्फत पोखराको पर्यटनलाई थप उचाइमा पुर्‍याउनु हाम्रो उद्देश्य हो,’ लामिछानेले भने।