सीआईबीद्वारा आपराधिक घटनामा संलग्न १२५ पक्राउ, ठगी घटनाका आरोपी धेरै

काठमाडौं– नेपाल प्रहरीको केन्द्रीय अनुसन्धान ब्यूरो (सीआईबी)ले गत वर्ष २०७९/८० मा विभिन्न आपराधिक क्रियाकलापमा संलग्न रहेका १२५ जनालाई पक्राउ गरी कारबाहीको दायरामा ल्याइएको बताएको छ।
पक्राउ परेकाविरुद्ध ४३ वटा मुद्दा दर्ता गरेको सीआईबीका प्रवक्ता प्रहरी उपरीक्षक सञ्जयसिंह थापाले जानकारी दिए।

विभिन्न कसुरमध्ये सबैभन्दा बढी ठगीको देखिएको उनको भनाइ छ। सीआईबीले ठगीमा पक्राउ परेको ७५ जनाविरुद्ध २६ वटा मुद्दा दर्ता गरेको छ। जुवासम्बन्धी कसुरमा ११ जना विरुद्ध दुई मुद्दा, नागरिकतासम्बन्धी एक जना विरुद्ध एक, संगठित अपराधमा दुई जना पक्राउ गरी एक मुद्दा दर्ता भएको सीआईबीले जनाएको छ।

खेलसम्बन्धी तीन एक, दूरसञ्चार हानिसम्बन्धी १४ जनाविरुद्ध दुई, सहकारी ठगीमा १४ जना पक्राउ गरी पाँच, लिखतसम्बन्धी चार जनालाई पक्राउ गरी तीन मुद्दा र राष्ट्र बैंक तथा बैंकिङ कसुरमा एक–एक वटा मुद्दा दर्ता भएको सीआईबीको विवरणमा उल्लेख छ।

आर्थिक अपराध अनुसन्धानको सिलसिलामा आठ मुद्दा दर्ता भई ३९ जनालाई पक्राउ गरिएको बताइएको छ। यस्तै, लिखत ठगी र वैदेशिक रोजगार, नागरिकता ऐनअन्तर्गतको कसुरमा १६ वटा मुद्दा दर्ता भई ५७ जनालाई पक्राउ गरी कानुनी दायरामा ल्याइएको छ। वन्यजन्तु तथा वातावरणीय अपराध अनुसन्धानमा आठ अपरेसन सञ्चालन गरेर ३५ जनालाई पक्राउ गरी कानुनी कारबाहीका लागि सम्बन्धित डिभिजन वन कार्यालयमा बुझाइएको छ।

मुद्दा फैसलातर्फ सजाय ठहर भई फरार रहेका विभिन्न १ सय २५ जना प्रतिवादीलाई पक्राउ गरी ३० करोड ६ लाख जरिमाना असुल र १२९ वर्ष कैद सजाय फस्र्योटका लागि अदालतमा पठाइएको छ। सीआईबीले प्रविधि प्रयोग बढ्दै गएको सन्दर्भमा अपराध गर्ने शैली र अपराधिक गिरोहको सञ्जाल देश विदेशसम्म विस्तार भइरहेकाले अपराध अनुसन्धान थप चुनौतीपूर्ण हुँदै गइरहेको निष्कर्ष निकालेको छ।