व्यवसायी सफल भए समृद्ध नेपाल बनाउन सहयोग पुग्छ : मुख्यमन्त्री अधिकारी

पोखरा- गण्डकी प्रदेशका मुख्यमन्त्री खगराज अधिकारीले व्यवसायीको सफलताले नै ‘सुखी नेपाली, समृद्ध नेपाल’ बनाउन सहयोग पुर्‍याउने बताएका छन्। पोखरामा होटल पौवाको ११औं शाखाको उद्घाटन कार्यक्रमलाई सम्बोधन गर्दै मुख्यमन्त्री अधिकारीले व्यवसायीहरु सफल भए मात्र समृद्ध नेपाल बन्न सक्ने बताएका हुन्। सामूहिक लगानीबाट गरिएको व्यवसायले देशमा रोजगारी सृजना गर्ने उनको भनाइ छ।

‘मुलुक राजनीतिक अस्थिरतामा फसेको छ, युवाहरु विदेश पलायनमा लागेका छन्, मुख्यमन्त्री अधिकारीले भन्नुभयो, ‘सामूहिक लगानीमा सुरु गरेको व्यवसायले देशमा रोजगारीका अवसरसँगै व्यापार व्यवसायले ‘सुखी नेपाली समृद्ध नेपाल’ बनाउन सहयोग पुग्दछ।’

कार्यक्रममा पर्यटनकर्मी गणेश भट्टराईले राजनैनिक अस्थिरताले अर्थव्यवस्थामा असर परेको बताए। ‘राजनीतिककर्मीहरु देश सञ्चालन भन्दा राजनीतिक भागबन्दामा लाग्दा युवा नागरिकहरुले नेपालमा भविष्य देखेनन्,’ भट्टराईले भने, ‘राजनीतिकर्मीहरुले देश सञ्चालनमा ध्यान नदिँदा राजनैतिक अस्थिरताले अर्थव्यवस्थामा असर परेको छ।’ देशको कठिन परिस्थितिमा पनि व्यवसायमा लगानी गर्नु चुनौतीपूर्ण रहेको बताउँदै धैर्य गरेर अगाडि बढे सफलता प्राप्त गर्ने बताए।

होटल पौवा, पोखराले तीन दिनसम्म होटलमा स्वाद उत्सव मनाउन सुरु गरेको छ। स्वाद उत्सवकै क्रममा भोलि (शनिबार) गजलकार थानेश्वर गौतमको एकल साँझसमेत आयोजना गरिएको होटल व्यवस्थापनले जानकारी दिएको छ।

मिसन १ सयको यात्रामा निरन्तर अगाडि बढेको होटल पौवाले ७औं वर्षमा ११औं शाखा पोखरामा सञ्चालन ल्याएको होटलका निर्देशक विष्णु ज्ञवालीले बताए। ‘७ वर्ष अगाडि रुपन्देहीको सालझण्डीबाट सुरु गरेको १ सय मिसनको यात्रा ११औँ शाखाको रुपमा पोखरामा सञ्चालन गर्न पाउँदा खुशी छौं,’ भण्डारीले भने, ‘पाँच प्रदेशमा होटलको शाखा पुर्‍याएको पौवाले कर्णालीको जुम्लादेखि गण्डकीको पोखरामा आइपुगेका छौं।’ उनका अनुसार १२औं शाखा काठमाडौंमा खोल्ने तयारी समेत होटल पौवा प्रालिले गरेको छ। करिब १० करोडको लगानीमा पौवा प्रालिले पोखराको लेकसाइड स्ट्रिट नम्बर १ मा होटल पौवा सञ्चालनमा ल्याएको हो।

यसैबीच होटल पौवा, पोखराले तीन दिनसम्म होटलमा स्वाद उत्सव मनाउन सुरु गरेको छ। स्वाद उत्सवकै क्रममा भोलि (शनिबार) गजलकार थानेश्वर गौतमको एकल साँझसमेत आयोजना गरिएको होटल व्यवस्थापनले जानकारी दिएको छ।