इन्धनमा कमिसन लिन हाकिमकै सेटिङ, निगमका पोखरा प्रमुख सम्पर्कविहीन

पोखरा- नेपाल आयल निगमको पोखरास्थित कार्यालयका प्रमुख र व्यवसायीको मिलेमतोमा पेट्रोलियम पदार्थको अवैध कारोबार भएको खुलासा भएको छ। निगमको पोखरास्थित गगनगौंडाका प्रमुख चितरञ्जन दासले चलानी बिलभन्दा बढी तेल लोड गरेर कमिसन लिने गरेको भेटिएको हो।

नेपाल आयल निगम प्रादेशिक कार्यालय गगनगौँडा डिपो पोखराबाट बिहीबार डिजेल लोड भएको ट्यांकरमा खरिद गरेको डिजेल परिमाण भन्दा बढी भेटिएपछि ट्यांकरसहित पक्राउ परेको छ। पोखरा डाँडाकोनाकमा रहेको पश्चिमाञ्चल ट्रेडर्सले खरिद गरेको डिजेलभन्दा बढी पाइएपछि विशेष सुराकीको आधारमा जिल्ला प्रशासन कार्यालय कास्कीको टोलीले ट्यांकरसहित पक्राउ गरेको हो।

१२ हजार लिटर डिजेलको बिल काटिएकामा नेपाल आयल निगमका नेपाल आयल निगमको पोखरा स्थित गगनगौंडाका प्रमुख चितान्दक दासले करिब १५ हजार लिटर लोड गरिदिएका थिए। प्रारम्भिक अनुमान अनुसार दासले यसरी बढी लोड गरेबापत कमिसन लिने गरेको कर्मचारीको आरोप छ।

बिहीबार ट्यांकर समातिने बित्तिकै प्रशासनले कार्यालय प्रमुख दासलाई उपस्थित हुन भनेको थियो। तर उनी उपस्थित भएनन्। दासको मोबाइल स्विच अफ छ। यसपछि उनी सम्पर्कविहीन छन्।

डिजेल ढुवानीमा प्रयोग गरिएको पश्चिमाञ्चल ट्रेडर्सको ग २ ख ८३६ नम्बरको ट्यांकर बिहीबार डाँडाकोनाकबाट समातिएको हो। छानबिन गर्दा बिलभन्दा बढी डिजेल लोड भएको प्रमाणित भएको कास्कीका सहायक प्रमुख जिल्ला अधिकारी गुरुदत्त ढकालले बताए। उनले थप अनुसन्धानका लागि सम्बन्धित निकायमा पठाएको बताए।

ट्यांकर समातिएपछि कार्यालय प्रमुख दास सम्पर्कविहीन छन्। बिहीबार ट्यांकर समातिने बित्तिकै प्रशासनले दासलाई उपस्थित हुन भनेको थियो। तर उनी उपस्थित भएनन्। दासको मोबाइल स्विच अफ छ। यसपछि उनी सम्पर्कविहीन छन्।

पोखराको प्रादेशिक कार्यालयमा आइपुग्दा सुरुमा भरिएको भन्दा डिजेलमा ०.२ प्रतिशत र पेट्रोलमा ०.८ प्रतिशत परिमाण घट्नु सामान्य भएपनि त्यो भन्दा बढी नोक्सान हुने गरेको विवरण निगममा छ। दासलाई केन्द्रीय कार्यालयले नै अपरेसनमा नजान निर्देशन गरेपनि नटेरेको बताइएको छ। निगमका अनुसार दास कार्यालय प्रमुख भएर आएपछि पोखरा कार्यालयले अघिल्लो वर्ष भन्दा दोब्बर नोक्सानी व्यहोरेको छ।

जिल्ला प्रशासन कार्यालयले यसको अनुसन्धान र थप कारबाहीका लागि अख्तियार कार्यालयलाई जिम्मा दिएको छ। दास यसअघि धनगढी, झापा र भैरहवामा रहँदा पनि विवादित थिए। उनलाई निगमले अनुसन्धान नसकिएसम्मका लागि निलम्बन गरेको छ।

पोखराको प्रादेशिक कार्यालयबाट कास्की सहित तनहुँ, स्याङ्जा, बागलुङ, पर्वत, म्याग्दी र मुस्ताङमा पेट्रोलियम पदार्थ दिँदै आएको छ। सरदरमा दैनिक ३ लाख लिटर डिजेल र १ लाख २० हजार लिटर पेट्रोल गगनगौंडाले बिक्रि गर्दै आएको छ।